Policia e Kosovës ka arrestuar tre persona mbrëmjen e së shtunës në rrugën “Gazmend Zajmi” në Prishtinë, në një aksion që ka mobilizuar disa njësite policore.
Në një video, te publikuar shihen disa policë që mbajnë të shtrirë tre personat e arrestuar. Vërehen edhe vetura të tjera policore që vijnë në shpejtësi të madhe.
Policia e Kosovës ka konfirmuar rastin duke bërë të ditur se vetura me tre personat e arrestuar ishte nën ndjekje të policisë, pasi fillimisht kishte tentuar t’i shmangej një pikë kontrolli në një rrugë tjetër.
“Sot rreth orës 19:45, një veturë është sinjalizuar nga ana e zyrtarëve policor që të ndalohet në një pikë kontrolli, në rrugën ‘Xheladin Hana’ në Prishtinë porse e njëjta ka provuar t’i shmanget policisë, duke mos u ndalur. Vetura e dyshuar është ndaluar shumë shpejt nga një njësit tjetër patrullues në rrugën ‘Gazmend Zajmi’ me ç’rast janë arrestuar tre persona të dyshuar”, thuhet në përgjigjen e Policisë.
Policia ka thënë se aktualisht ndaj personave të dyshuar në koordinim me prokurorin e shtetit, po kryen veprimet e mëtejme hetimore e procedurale.
