Alarm nga Gjermania e Holanda: Rusia po përdor armë kimike në Ukrainë, mbi 9,000 sulme që nga 2022

Shërbimi federal gjerman i inteligjencës (BND), në një raport të përbashkët me shërbimet holandeze të inteligjencës dhe ato ushtarake, ka akuzuar Rusinë për rritjen e përdorimit të armëve kimike në Ukrainë, në shkelje të Konventës për Armët Kimike.

Sipas The Guardian, ministri holandez i Mbrojtjes, Ruben Brekelmans, ka deklaruar në lidhje me raportin se: “Armët po përdoren në mënyrë sistematike dhe në shkallë të gjerë”.

Ai tutje ka shtuar se, “kjo është një rrugë e papranueshme dhe tregon sërish brutalitetin me të cilin përballet Ukraina.”
Ndër të tjera Brekelmans ka thënë se “ulja e pragut për përdorimin e këtij lloji të armëve paraqet rrezik jo vetëm për Ukrainën, por edhe për pjesën tjetër të Evropës dhe botës,” duke shtuar se duhen më shumë sanksione, izolim të Rusisë dhe mbështetje të vazhdueshme për Ukrainën.

Sipas të dhënave të përfshira në raport, të bazuara në regjistrimet e palës ukrainase, bëhet e ditur se “Rusia ka kryer më shumë se 9,000 sulme me armë kimike ndaj trupave ukrainase që nga fillimi i pushtimit në vitin 2022”, me të paktën tre viktima të konfirmuara si pasojë direkte e ekspozimit ndaj agjentëve kimikë.