Ambasada e Kosovës në Izrael apelon për vigjilencë pas sulmit ndaj Iranit

Ambasadorja e Kosovës në Izrael, Ines Demiri, ka bërë thirrje që qytetarët kosovarë që ndodhen në Izrael të jenë të kujdesshëm, pas sulmit të kryer sot nga Izraeli ndaj Iranit.

Në një njoftim në Facebook, ambasadorja ka sqaruar se për çdo situatë urgjente, qytetarët mund të kontaktojnë numrin +972 586 340450, raporton Klankosova.tv

“Në vazhdën e situatës së jashtëzakonshme, u bëjmë apel të gjithë qytetarëve të Republikës së Kosovës që ndodhen në Izrael të tregojnë vigjilencë të shtuar, të ndjekin me kujdes njoftimet zyrtare dhe të zbatojnë udhëzimet e sigurisë të autoriteteve vendore. Ministria e Punëve të Jashtme dhe Diasporës, së bashku me Ambasadën e Kosovës në Izrael, po monitorojnë nga afër zhvillimet aktuale. Ju informojmë se Ambasada e Kosovës në Izrael është plotësisht në dispozicion të qytetarëve tanë dhe mbetet në komunikim të vazhdueshëm me institucionet përkatëse vendase. Për çdo rast urgjent, qytetarët e Republikës së Kosovës që ndodhen në Izrael mund të kontaktojnë në numrin: +972 586 340450”, shkroi ajo.

Demiri theksoi se MPJD dhe Ambasada po ndjekin nga afër situatën dhe janë në gatishmëri për të ofruar ndihmë.

“Ju lutemi që numri i emergjencës të përdoret vetëm nga qytetarët që aktualisht ndodhen në Izrael. Ky kontakt nuk është i dedikuar për kërkesa nga mediat. MPJD dhe Ambasada do të vazhdojnë të informojën rregullisht për çdo zhvillim të ri”, shkroi ambasadorja.