Gazetari nga Tirana, Arsen Rusta, ka treguar detaje nga arrestimi i pesë personave për trafik droge, në mesin e tyre edhe ish-asamblisti i VV-së në Prishtinë, Besnik Mujeci.
Rusta tregon se fillimisht policia është shtirë si një blerës i drogës duke e kontaktuar direkt Mujecin, i cili me të parë fotografinë e shumës së parave, kishte marrë rrugën nga Prishtina drejt Tiranës.
“Bëhet fjalë për një dorëzim të kontrolluar, personit të cilit po i shitej droga nga tre shtetasit e Kosovës, me ndërmjetsimin e Ambra Miftarit boses së grupit kriminal, ishte një punonjës policie me pseudonimin “Faikoi”, ai ka dorëzuar 30 mijë euro anëtarëve të grupit, është dhënë lënda narkotike prej 11 mijë e 320 doza ekstazi, e në atë moment ka ndërhyrë policia, ndërsa të rinjtë ishin joshur duke menduar se po kryejnë një trafikim me lëndë narkotike duke mos ditur se blerësi ishte një punonjës policie”, tha ai në Kanal 10.
Ai shton se kjo drogë nuk do të qëndronte vetëm në Tiranë por do të shpërndahej në plazhet e Shqipërisë dhe një pjesë e konsumatorëve ishin edhe shtetas kosovar.
Për këtë aksion ka reaguar edhe Taulant Balla, ministër i Brendshëm i Shqipërisë, i cili e ka përgëzuar Policinë e Shtetit për aksionin.
Ndër të tjera ai ka thënë duhet ndjekur fijet e të shkohet te bosët e tyre.
Postimi i plotë:
Suksesi i operacionit të radhës të Policisë së Shtetit në goditjen e një rrjeti trafikantësh nga Kosova në Shqipëri dhe sekuestrimi i një sasie shumë të madhe dozash/tabletash të një lloj droge nxjerr në pah dhe nevojën e një lufte edhe më të ashpër ndaj këtij fenomeni. Kjo është një betejë dhe një sfidë për policinë e çdo vendi dhe disa mund të thonë se është e vështirë, se edhe vendet e tjera e kanë këtë problem. Unë nuk mendoj kështu. Në javët e fundit janë goditur disa rrjete shpërndarësish lëndësh narkotike edhe pse duhen ndjekur fijet dhe duhet të shkohet tek “bosat” e tyre sa më shpejt.
