Ekipi i boksit të Kosovës nuk u lejua as ditën e sotme, më 24 tetor, të marrë pjesë në Kampionatin Botëror të Boksit që zhvillohet në Beograd.
Ekipi i boksierëve shqiptarë tentoi të kalojë kufirin për në Serbi, në Merdarë, por pas disa orë pritje dhe kontrollim të detajuar, ata nuk u lejuan të kalojnë kufirin.
Komiteti Olimpik i Kosovës ka reaguar dhe beson se ata morën urdhërin nga qeveria e Serbisë për të mos lejuar hyrjen e boksierëve kosovarë në Serbi.
Ekipi i boksit të Kosovës ishte nisur për herë të tretë për në Serbi, pas insistimit të Komitetit Olimpik Ndërkombëtar dhe Shoqatës Ndërkombëtare të Boksit, AIBA.
Më tej Komiteti Olimpik i Kosovës shkroi në Facebook se do kërkojnë të marrin masa për këtë parregullsi që iu është bërë ekipit të Kosovës.
“KOK dënon ashpër veprimin e Qeverisë së Serbisë, derisa do të kërkojë nga Komiteti Olimpik Ndërkombëtar dhe organet tjera përkatëse të marrin masa ndaj Serbisë”.
