Çfarë shkruhet në dokumentin që Vuçiq ka pranuar dhe që dëshmon se ai nuk kishte asgjë kundër anëtarësimit të Kosovës në KiE

Kosova mori “dritën e gjelbër” për anëtarësim në Këshillin e Evropës, gjë që zyrtarët serbë e dënuan. Ata e quajtën këtë vendim “muzg i së drejtës ndërkombëtare”, por edhe “turp dhe skandal”.

Megjithatë, askush nuk përmendi se presidenti serb Aleksandar Vuçiq, duke pranuar marrëveshjen e Ohrit dhe Planin Evropian, i mundësoi Kosovës anëtarësimin e organizatave ndërkombëtare, shkruan portali serb “Nova.rs”.

Plani evropian apo “franko-gjerman” për Kosovën de facto u bë korniza e re negociuese për Kosovën dhe Serbinë në janar të vitit të kaluar.

Presidenti serb, Aleksandar Vuçiq, fillimisht ka refuzuar të marrë letrën e përmendur, prej të cilit, sipas tij “dhemb koka”, e më pas dokumenti i përmendur është pranuar si pjesë e kornizës së re të negociatave, transmeton Papapraci.

E në këtë dokument, ndër të tjera, shkruan se Serbia nuk do ta pengojë Kosovën dhe aspiratat së saj drejt anëtarësimit në organizatat ndërkombëtare.

Në nenin 4 të Marrëveshjes thuhet qartë se “Serbia nuk do të kundërshtojë anëtarësimin e Kosovës në asnjë organizatë ndërkombëtare”, dhe këtë marrëveshje e ka pranuar edhe presidenti serb, Aleksandar Vuçiq, e çka zyrtarët serbë mesa duket “kanë harruar” kur kanë komentuar vendimin e Komisionit.

Komisioni për Çështje Politike dhe Demokraci i Asamblesë Parlamentare të Këshillit të Evropës ka dhënë mendim pozitiv lidhur me kërkesën e Kosovës për anëtarësim në këtë organizatë.

Ministri i jashtëm serb në largim, Ivica Daçiq e ka quajtur një veprim të tillë “muzg të së drejtës ndërkombëtare” dhe “turp dhe skandal”, ndërsa kryenegociatori serb, i cili ka qenë pjesë e delegacionit të Vuçiqit kur e kanë pranuar këtë marrëveshje, Petar Petkoviq, e ka quajtur “muzg i arsyes”.

Mirëpo, ata nuk e thanë një gjë shumë të rëndësishme – nga erdhi ky “muzg” dhe pse Komisioni dha dritën e gjelbër për anëtarësim vetëm tani, edhe pse Kosova ka paraqitur kërkesë qysh në vitin 2022. Është rezultat i marrëveshjes së vitit të kaluar në lidhje me planin evropian që Kosova të përfaqësohet në institucionet ndërkombëtare”, ka thënë Ilir Deda nga Instituti i Shkencave Shoqërore në Vjenë, për mediumin N1.