Sarajeva Lindore është pjesë e entitetit Republika Srpska, ku urrejtja ndaj Kosovës e shqiptarëve është e theksuar. Republika Srpska është njëra prej dy entiteteve të Bosnjë-Hercegovinës dhe kontrollohet plotësisht nga serbët. Bosnjë-Hercegovina nuk e njeh shtetin e Kosovës pikërisht për shkak të Republika Srpskas dhe bllokadave që paraqet ajo.
Por serbët në Sarajevën Lindore të shtunën janë njohur me nivelin e xhudistëve kosovarë. Dhe për më tepër, me himnin e shtetit të Kosovës.
“Çka do të thonë për këtë Dodiku e Kosharaci: Himni i Kosovës intonohet në sheshin ‘Serbia’ në Sarajevën Lindore”, është titulli i shkrimit në gazetën “Slobodna Bosna”.
Ky medium ka njoftuar se në këshillin organizativ të Ballkanikut ishin edhe kryetari i komunës së Sarajevës Lindore, Lubisha Qosiq dhe Miroslav Vujiçiq, deputet serb në Bosnjë-Hercegovinë.
Në Ballkanik kanë garuar rreth 150 xhudistë nga Bosnjë-Hercegovina, Mali i Zi, Maqedonia e Veriut, Bullgaria, Rumania, Greqia, Turqia, Moldavia, Shqipëria e Kosova. Xhudistët e Serbisë refuzuan pjesëmarrjen pasi mori pjesë Kosova.
“Është interesant se pas garimit të garuesve kosovarë në sallën ‘Serbia’, në sheshin ‘Serbia’ në Sarajevën Lindore, është intonuar himni i Kosovës”, shkruan “Slobodna Bosna”.
“Pasi pushteti në Republika Srpska dhe në Sarajevën Lindore nuk e njohin Kosovën si shtet, fillimisht do të mund të mendohej se është ndonjë lëshim i organizatorit. Por kjo është pak e besueshme duke ditur se kush ishte në këshillin organizativ. Mbetet të shihet nëse Qosiqi dhe Vujiçiqi do të kenë pasoja politike për shkak të intonimit të himnit të Kosovës në mes të Sarajevës Lindore”.
Milorad Dodik e Stasha Kosharac, që janë përmendur në titull, janë drejtuesit e serbëve të Bosnjë-Hercegovinës.
Xhudistët e Kosovës për herë të parë kanë garuar në Sarajevën Lindore dhe në pjesën e Republika Srpskas. Medalje të arta fituan Flaka Loxha dhe Dëbora Gjakova. Në nderim të tyre është intonuar himni i Kosovës. Në video-incizim shihet që himni i Kosovës është ndalur pa përfunduar. Por megjithatë është lëshuar në sallën “Serbia”.
KOHA ka mësuar se para se të lëshohej himni i Kosovës nga salla janë larguar shumica e shikuesve, por edhe zyrtarë serbë. Prej atyre që ishin në sallë, disa nuk janë ngritur në këmbë për ta respektuar himnin e Kosovës.
Medaljet e ndara në këtë Ballkanik ishin me motive nacionaliste serbe, por megjithatë kjo nuk e ul vlerën e suksesit të xhudistëve kosovarë që nga kjo zonë thuajse armiqësore kthehen me pesë medalje. Ata i kanë kthyer mbrapsht medaljet gjatë fotografimit, edhe në shenjë revolte për përmbajtjen e tyre.
Organizatorët megjithatë janë kujdesur që xhudistët kosovarë të kenë siguri gjatë qëndrimit në Sarajevën Lindore.
Se serbët e kanë pranuar shumë rëndë suksesin e Kosovës në Sarajevën Lindore e konfirmon edhe një postim i Zhelko Shilegoviqit, trajnerit të klubit që e organizoi Ballkanikun.
“Kujdesemi që në qytetin tonë të organizojmë ngjarje të madhe, ku erdhën luftëtarët më të mirë të Evropës dhe botës, e më pas armiqëve u pengojnë kosovarët që janë pjesë e Federatës Ballkanike të Xhudos dhe të Komitetit Olimpik Ndërkombëtar dhe të cilët askush nuk i sjell por kanë të drejtë të marrin pjesë si gjithë të tjerët. Pse zotëri patriotë nuk keni ndaluar ardhjen e tyre? Të respektuar armiqë të qytetit tonë, vazhdimisht kemi paralajmëruar garën dhe i jemi drejtuar ministrisë sonë të punëve të brendshme që në mënyrën më profesionale ka bërë çdo gjë që gara të shkojë në mënyrën më të mirë. Ju të gjorë jeni shumë të vegjël që të mund të ndikoni në ndonjë gjë”, ka shkruar Shilegoviq.
