Daçiqi do të padisë politikanen që e akuzonte se me paratë e shitjes së armëve po paguan tërheqjen e njohjeve për Kosovën

Ministri i Jashtëm i Serbisë, Ivica Daçiq ka paralajmëruar padi ndaj nënkryetares se Partisë së Lirisë dhe Drejtësisë si dhe deputeten në Kuvendin e Serbisë, Marinka Tepiqin, për shkak të pohimeve të saj se biznesmenët serbë kanë paguar për tërheqjet e njohjeve për Kosovën, madje edhe nga paratë e shitjes së armëve, bën të ditur RTS, transmeton Koha.net.

Daçiq i ka thënë RTV të Vojvodinës se tashmë e ka autorizuar zyrën e avokatit Toma File që të padisë Marinka Tepiqin, “sepse e ka fyer Serbinë dhe i ka shkaktuar dëme asaj”.

“Askush nuk e ka fyer Serbinë dhe nuk i ka shkaktuar aq dëm sa ajo me marrëzitë që i ka thënë”, thotë Daçiq.

Sipas tij, Serbia pas votimit në UNESCO, ku me një votim të ngushtë u pengua hyrja e Kosovës në këtë institucion ndërkombëtar, nisi të bëjë politikë sistematike dhe të vendosë miqësi dhe raporte strategjike me vende të tjera.

“Çfarë blerjeje. Mendoni se Gana ose ndonjë vend tjetër është e tillë sa tash në saje të blerjes të marrë vendim për tërheqjen e njohjes”, është shprehur Daçiq, duke shtuar se vendimet për lobime për tërheqjen e njohjeve për Kosovën janë “vendime strategjike” pas të cilave shteti nënshkruan marrëveshje për partneritet strategjik me vendin e caktuar, u jep bursa studentëve, heq vizat, merr pjesë në financimin e projekteve zhvillimore, ka thënë ai, transmeton Koha.net.

Pasi ka theksuar se deklaratat e tilla të Marinka Tepiqit e kanë vështirësuar shumë pozicionin e Serbisë dhe të njerëzve të saj që bisedojnë me vende të ndryshme, Daçiq ka shtuar se “do të ketë tërheqje të tjera njohjesh për Kosovën, por për këtë tani nuk mund të flasë”.