Deçanasin e ngacmon ish e dashura, ia publikon foton gjysmë të zhveshur

Vajzat dhe gratë janë viktimat më të shpeshta të dhunës në familje, ngacmimeve e sulmeve seksuale.

Por ndonjëherë ka raste kur edhe burrat përballen me të tilla raste dhe kërkojnë ndihmën e Policisë. Kështu ka ndodhur së fundmi me një rast në Deçan, ku një burrë është ngacmuar nga ish e dashura e tij, raporton Gazeta Sinjali.

Burimet nga Prokuroria kanë bërë me dije viktima ka deklaruar se ish e dashura e tij K.S., në vazhdimësi që nga muaji nëntor po e ngacmon, e për të mos mbaruar me kaq ia ka publikuar edhe një foto të tij, që ia kishte dërguar sa ishin të lidhur.

Bazuar në dëshminë e viktimës, e dyshuara e ka publikuar në Instagram dhe Facebook foton gjysmë të zhveshur ku shihet ai, duke i shkaktuar kështu shqetësim të madh, për çka e kërkoi ndihmën e Policisë.

Si rezultat i raportimit të rastit, Policia ka arritur që ta arrestojë gruan e dyshuar, e cila është shoqëruar në stacion policor për intervistim, ku ka dhënë deklaratën e saj para hetuesve policorë.

Me t’u përfunduar procedurat policore, e dyshuara është dërguar në mbajtje për 48 orë, nën dyshimet se ka kryer veprën penale “Ngacmim”.