Dhunë e paprecedentë në Holandë për Vit të Ri, dy të vdekur dhe dhjetëra të plagosur

Policia holandeze ka raportuar këtë të enjte, se është përballur me një nivel dhune të paprecedentë gjatë festimeve të natës së Vitit të Ri. Oficerët u sulmuan me fishekzjarre dhe eksplozivë, ndërsa raportet për sulme ndaj policisë dhe zjarrfikësve u përhapën në mbarë vendin.

Siç raporton BBC, në Amsterdam, kisha e shekullit XIX Vondelkerk, e ndërtuar në vitin 1872 dhe e vendosur pranë parkut më të madh të qytetit, Vondelpark, u përfshi nga flakët në orët e para të ditës së Vitit të Ri. Kulla 50 metra e lartë e saj u shemb, ndërsa çatia u dëmtua rëndë. Autoritetet thanë se struktura pritet të mbetet e qëndrueshme.

Mediat lokale raportuan se një djalë 17-vjeçar nga Nijmegen dhe një burrë 38-vjeçar nga Aalsmeer humbën jetën nga incidentet me fishekzjarre. Në Rotterdam, spitali i syrit trajtoi 14 pacientë, përfshirë 10 të mitur, për lëndime të rënda në sy. Dy prej tyre iu nënshtruan operacionit.

Ngjarje tragjike u shënuan edhe në Gjermani, ku policia e Bielefeld raportoi se dy 18-vjeçarë humbën jetën pasi ndezën fishekzjarre të prodhuara në shtëpi.

Në qytetin jugor Breda, policia u sulmua me bomba benzine. Kryetarja e Unionit të Policisë, Nine Kooiman, tha se gjatë shërbimit të saj në Amsterdam u godit me fishekzjarre dhe eksplozivë. “Sasia e dhunës ishte e paprecedentë,” deklaroi ajo.

Sipas Shoqatës së Piroteknikës Holandeze, këtë vit u shpenzuan 129 milionë euro për fishekzjarrë, një rekord i ri. Autoritetet kanë njoftuar se ndalimi i fishekzjarreve jozyrtare do të hyjë në fuqi në vitin 2026.