Lëvizja Vetëvendosje dhe LDK-ja, dy ish-partnerët qeverisës në seancën e së martës (23 qershor) të kësaj jave që po e lëmë pas u përplasën keq me njëra-tjetrën.
E gjitha nisi pasi deputeti i VV-së, Artan Abrashi, e kishte quajtur qeverinë Hoti ilegale dhe Avdullah Hotin kryeministër “Koti”.
Kjo gjë kishte bërë që të reagoj fuqishëm kreu i grupit parlamentar të LDK-së, Arben Gashi, të kërkonte përjashtimin nga salla të deputetit të VV-së, ose ky i fundit ta tërheq fjalën.
Por asnjëra nuk ndodhi. As deputeti Abrashi nuk e tërheqi fjalën dhe as nuk u morën masa ndaj tij.
Në mbështetje Abrashit i doli kryetari i grupit parlamentar të VV-së, Rexhep Selimi, i cili kishte thënë se LDK-ja le ta harron që largon deputet të VV-së nga salla, ndërsa kishte thënë se fjala koti s’është gjuhë jo parlamentare.
Kryetarja e Kuvendit, Vjosa Osmani, nuk e kishte hedhur në votim mocionin procedural të kërkuar nga deputeti i LDK-së, Arben Gashi duke thënë se do të kërkoj nga Komisioni për Legjislacion që të konstatoj nëse fjala koti është shkelje apo gjuhë jo parlamentare.
“Sipas interpretimeve të administratës nuk mund të kërkohet mocion procedural, në qoftë se mendoni se ka shkelje të rregullores apo drejtave të deputetit mund ta dërgoni për interpretim në komisionin përkatës”, tha Osmani.
Gazeta Online “Reporteri.net”, ka kontaktuar kryetarin e Komisionit për Legjislacion, Shkëmb Manaj për ta pyetur nëse ka shkuar për shqyrtim në komisionin që udhëheq ai nëse fjala koti është fyese.
“Ende nuk ka ardhur kërkesa në Komision, nëse vjen, Komisioni do ta shqyrtoj në pajtim me kompetencat dhe me dispozitat e Rregullores së Punës të Kuvendit!”, ka thënë Manaj për Reporteri.net.
Kujtojmë se kryekuvendarja Osmani ka thënë se në momentin që Komisioni për Legjislacion e konstaton se fjala koti është fyese, atëherë ajo do t’ia ndaloj deputetëve që ta përdorin.
