Franca synon të ndjekë Australinë dhe të ndalojë rrjetet sociale për fëmijët

Franca synon të ndjekë shembullin e Australisë dhe të ndalojë platformat e rrjeteve sociale për fëmijët duke nisur nga fillimi i vitit akademik 2026.

Një projektligj që ndalon përdorimin e rrjeteve sociale për fëmijët nën moshën 15 vjeç do të paraqitet për verifikim ligjor dhe pritet të diskutohet në parlament në fillim të vitit të ri.

Presidenti francez, Emmanuel Macron, ka bërë të qartë javët e fundit se dëshiron që Franca të ndjekë shpejt ndalimin e parë në botë të Australisë për platformat e rrjeteve sociale për të miturit nën 16 vjeç, i cili hyri në fuqi në dhjetor. Ky ndalim përfshin Facebook-un, Snapchat-in, TikTok-un dhe YouTube-in, shkruan The Guardian, transmeton Gazeta Express.

Gazetat Le Monde dhe France Info raportuan të mërkurën se projektligji tashmë është gati dhe përmban dy masa: ndalimin e rrjeteve sociale për fëmijët nën 15 vjeç dhe ndalimin e telefonave celularë në shkollat e mesme, ku mësojnë të rinjtë nga 15 deri në 18 vjeç. Telefonat janë tashmë të ndaluar në shkollat fillore dhe të ciklit të ulët të mesëm.

Projektligji do t’i paraqitet në ditët në vijim Këshillit të Shtetit të Francës (Conseil d’État) për shqyrtim ligjor. Sindikatat e arsimit do të shqyrtojnë gjithashtu propozimin për ndalimin e telefonave në shkollat e mesme.

Qeveria dëshiron që ndalimi i rrjeteve sociale të hyjë në fuqi në shtator 2026.

Sipas Le Monde, teksti i projektligjit përmend “rreziqet e përdorimit të tepruar të ekraneve nga adoleshentët”, përfshirë ekspozimin ndaj përmbajtjeve të papërshtatshme në rrjetet sociale, bullizmin online dhe çrregullimet e gjumit. Projektligji thekson nevojën për të “mbrojtur brezat e ardhshëm” nga rreziqet që kërcënojnë aftësinë e tyre për të lulëzuar dhe për të jetuar së bashku në një shoqëri me vlera të përbashkëta.

Më herët këtë muaj, Macron konfirmoi gjatë një debati publik në Saint-Malo se dëshironte një ndalim të rrjeteve sociale për adoleshentët e rinj. Ai tha se po krijohej një “konsensus” për këtë çështje pasi Australia ndërmori këtë hap.

“Sa më shumë kohë të kalohet para ekranit, aq më shumë bie arritja në shkollë… sa më shumë kohë para ekranit, aq më shumë rriten problemet e shëndetit mendor”, u shpreh ai.