Gazetari Margetiç hedh dritë mbi rolin e Vuçiçit si pjesë e një grupi snajperistësh në Bosnjë

Gazetari investigativ Domagoj Margetiç ka ofruar detaje të reja dhe dëshmi nga hetimi i tij lidhur me përfshirjen e presidentit serb Aleksandër Vuçiç në një grup snajperistësh gjatë luftës në Bosnjë dhe Hercegovinë, një ngjarje që ka tronditur opinionin publik.

Margetiç ka ndarë informacionin për lidhjet e Vuçiçit me një njësitë paraushtarake serbe që operonin në zonat e konfliktit, përfshirë në afërsi të Sarajevës.

Sipas hetimeve të Margetiç, grupi i snajperistëve ishte udhëhequr nga individë që kishin leje kalimi nga institucionet serbe, dhe Vuçiç, në atë kohë një figurë politike e njohur, ishte pjesë e këtij grupi. Ai shpjegon se Vuçiç mbante një badge të shërbimeve sekrete serbe dhe kishte një rol aktiv në shoqërimin e “klientëve” që kalonin përmes vijave të frontit.

Në intervistat e tij, Margetiç përmend se Mirko Blagojević, kreu i njësisë paraushtarake serbe, e ka konfirmuar rolin e Vuçiçit në udhëheqjen e operacioneve, duke siguruar kalimin e grupit të snajperistëve nga lokaliteti Ipale tek varrezat hebraike, një zonë që përdorej për kalimin e turistëve. Margetiç gjithashtu tregon se ka folur me eksponentë të njësisë paraushtarake serbe dhe ish-pjesëtarë të këtij grupi, të cilët kanë konfirmuar se Vuçiç ka qenë i pranishëm dhe ka luajtur një rol të rëndësishëm në këtë aktivitet.

“Shumica e dëshmive që kam mbledhur për këtë hetim vijnë nga anëtarë të njësisë paraushtarake serbe dhe njerëz që kanë qenë të përfshirë drejtpërdrejt në këtë grup”, ka thënë Margetiç.

Ai ka theksuar gjithashtu se hetimi nuk ka përmendur Serbinë si shtet, por ka pasur fokus vetëm tek individët dhe grupet që kanë marrë pjesë në këtë aktivitet.

Ky hetim i gazetarit Margetiç ka sjellë një dritë të re mbi periudhën e luftës në Bosnjë dhe Hercegovinë dhe lidhjet që presidenti Vuçiç mund të ketë pasur me strukturat paraushtarake serbe, duke shtuar më shumë dyshime dhe pyetje në lidhje me rolin e tij gjatë periudhës së konfliktit.