Grenellit i’u dobësua pozita në Uashington, mes mesazheve fyese dhe konflikteve në Shtëpinë e Bardhë

Richard Grenell punoi me vite për të ngjitur shkallët e pushtetit në administratën e Donald Trump, deri në kulmin e karrierës në vitin 2020, kur mori drejtimin e shërbimeve kombëtare të inteligjencës.

Richard Grenell punoi me vite për të ngjitur shkallët e pushtetit në administratën e Donald Trump, deri në kulmin e karrierës në vitin 2020, kur mori drejtimin e shërbimeve kombëtare të inteligjencës.

Gjashtë vite më vonë, në një moment kur Trump konsiderohej në kulmin e fuqisë së tij politike, Grenell gjendet në krye të Qendrës Kulturore Kennedy, dhe tashmë edhe kjo detyrë është vënë në pikëpyetje.

Karriera e tij mori një tjetër kthesë këtë muaj, pasi Trump njoftoi plane për mbylljen e Kennedy Center për një projekt të madh rindërtimi dyvjeçar. Vendimi vjen pas një viti trazirash të brendshme dhe anulimesh të profilit të lartë që kanë shoqëruar institucionin nën drejtimin e Grenell. Sipas burimeve që kanë punuar me të, vendimi për rikonstruksionin ishte i papritur dhe ka shtuar pasigurinë për të ardhmen e institucionit.

Richard Grenell, me origjinë nga Michigani dhe një figurë e njohur republikane me stil të ashpër diplomatik, dikur konsiderohej kandidat i mundshëm për poste të larta në kabinet. Por me kalimin e kohës, Grenell mbeti jashtë rrethit të ngushtë të Trump, sidomos pas përplasjeve të brendshme për Venezuelën, ku shërbeu si i dërguar special.

Grenell mbështeti një qasje më pragmatike ndaj Venezuelës, duke favorizuar negociatat dhe marrëveshjet energjetike, ndërsa Sekretari i Shtetit Marco Rubio shtyu për “presion maksimal” dhe një qëndrim më të ashpër ndaj regjimit të Nicolás Maduro. Sipas burimeve diplomatike të Daily Mail, përplasjet mes tyre çuan në përjashtimin gradual të Grenell nga vendimmarrja kryesore për këtë dosje.

Një tjetër episod që, sipas burimeve pranë Shtëpisë së Bardhë, ndikoi negativisht në pozicionin e tij ishte një përplasje me shefen e stafit, Susie Wiles, gjatë Konventës Kombëtare Republikane. Pretendohet se një debat për kohën e fjalimit të tij u përshkallëzua në tone të ashpra dhe mesazhe fyese, çka më pas ndikoi në mosangazhimin e tij në poste të nivelit të lartë në mandatin e dytë të Trump. Grenell e ka mohuar këtë përplasje dhe ka deklaruar se ruan marrëdhënie miqësore me Wiles.

Megjithëse nuk mori post në kabinet, drejtimi i Kennedy Center u konsiderua nga disa si një detyrë me peshë. Megjithatë, Grenell është përballur me kritika për shkurtim buxhetesh, polemika për riemërtimin e institucionit dhe bojkot nga disa artistë, ndërsa shitjet e biletave kanë rënë. Ai ka akuzuar media si CNN dhe The Washington Post se kanë nxitur reagimet kundër tij.

Paralelisht me rolin publik, Grenell ka vazhduar aktivitetet në sektorin privat, përfshirë partneritetin me firmën e investimeve Affinity Partners, e lidhur me Jared Kushner. Ai ishte i përfshirë në ndërmjetësimin e një projekti të madh hotelerie në Beograd, megjithëse mbetet e paqartë nëse marrëveshja është realizuar.

Burime pranë Shtëpisë së Bardhë thonë se tensionet e Grenell me stafin e administratës, përfshirë mesazhe fyese dhe mosmarrëveshje të zgjatura, e kanë dobësuar rëndë pozicionin e tij në qendër të pushtetit.

Sipas burimeve diplomatike, stili i tij konfrontues ka krijuar përçarje në komunitetin diplomatik, ndërsa ambicia e tij për t’u bërë Sekretar Shteti shihet tashmë si e vështirë për t’u realizuar.

Në kushtet e presionit në rritje, raportohet se Grenell u ka thënë miqve të afërt se planifikon të largohet nga drejtimi i Kennedy Center më vonë gjatë këtij viti.

Nga një figurë që synonte të drejtonte diplomacinë ose inteligjencën amerikane, Grenell sot përballet me një realitet më modest politik, ku ambiciet e tij përplasen me reputacionin e krijuar ndër vite.