Partia Demokratike e Kosovës ka akuzuar kryetaren e re të Parlamentit të Kosovës Vjosa Osmani se ka shkelur Ligjin për protokollin e Shtetit duke hequr fotografinë zyrtare të presidentit Hashim Thaçi nga zyra e saj dhe kërkon që kthimi i fotografisë së presidentit të vendit të ndodhë sa më parë.
“Vjosa Osmani, e zgjedhur natën dhe me votat e Listës Serbe, ka shkelur rëndë ligjin NR.03/L-132 Për Protokollin e Shtetit të Republikës së Kosovës duke hequr fotografinë zyrtare të Presidentit. Zbatimi i ligjit nuk varet nga dëshirat e askujt pavarësisht bindjeve politike dhe këtë gjë ajo duhet ta dijë mirë si eksperte dhe ligjëruese e jurisprudencës. Me veprimin e saj primitiv, kryekuvendarja e zgjedhur në mënyrë të dyshimtë, Vjosa Osmani përfaqëson mentalitetin e vjetër që synon hakmarrjen dhe përçon gjuhën e urrejtjes dhe përçarjes së qytetarëve”, thuhet në reagim.
Për më tepër, PDK konsideron se qysh në ditën e parë në pozitën e re, Vjosa Osmani po dëshmon se përfaqëson vetëm interesin e saj brenda partisë së vet dhe jo institucionit ku është zgjedhur.
“Me këtë veprim antiligjor ajo gjithashtu fyen rëndë edhe institucionin që drejton, Kuvendin e Kosovës, tempullin e demokracisë dhe ligjvënies në vendin tonë.
PDK ka dhënë shembull pas zgjedhjeve të 6 tetorit duke mbetur në opozitë dhe siguruar tranzicionin e pushtetit, por nuk do të tolerojë që të cenohet rendi kushtetues e ligjor dhe asnjë institucion i rëndësishëm i Kosovës”, thuhet më tej në reagim.
PDK bën thirrje që kthimi i fotografisë së presidentit të ndodhë sa më parë dhe që administrata e Kuvendit të Kosovës të reagojë pa vonesë, në të kundërtën, fotografia e presidentit do të rikthehet në pozitën e vet me çdo kusht, si ruajtje e karakterit kushtetues dhe sovranitetit të vendit.
Po ashtu, PDK ka bërë të ditur se është po ashtu duke shqyrtuar dhe analizuar anën legale të zgjedhjes së Vjosa Osmanit si kryetare e Kuvendit të Kosovës.
