Hoti, qeverisë: Dëgjoni propozimet e ShBA-së, ndryshe do të mbeteni të izoluar si regjimi i Enver Hoxhës

Ish-kryeministri i vendit, Avdullah Hoti, i ka sugjeruar qeverisë që të dëgjojë propozimet e Shteteve të Bashkuara të Amerikës.

Ai tha se kur Kosova është koordinuar me Shtëpinë e Bardhë është kornizuar dialogu me Serbinë vetëm për njohje reciproke, pa prekur karakterin unitar të vendit, ka ndodhur njohja nga Izraeli, është siguruar mbështetja nga MCC për gaz e energji.

“Mos e rrezikoni këtë mbështetje, sepse do të mbeteni të izoluar si regjimi i Enver Hoxhës. Sigurisht se populli i Kosovës nuk e lejon që izolimi të vazhdoj. Do të detyroheni të lironi zyret dhe të dorëzoni mandatin tek ata që e ruajnë dhe avancojnë miqësinë e përhershme me Shtetet e Bashkuara të Amerikës”, është shprehur Hoti, transmeton Klankosova.tv.

Kujtojmë se propozimi i fundit i të dërguarit special të ShBA-së për Ballkanin Perëndimor, Gabriel Escobar, është që Kosova ta shtyjë edhe për 10 muaj çështjen e targave, teksa shtoi se nuk ka marrë ndonjë zotim nga Kurti e Osmani.