Instituti i Luftës: Ukraina, drejt një fitoreje të madhe!

Instituti për Studime të Luftës (ISW) njoftoi në raportin e tij të fundit se Ukraina ka iniciativën në fushën e betejës dhe është në rrugën e saj për të arritur një fitore të madhe në rajonin Kherson.

Përveç kësaj, çlirimi ukrainas i Khersonit nuk do të jetë fitorja e fundit e Ukrainës në luftë, sipas vlerësimit të Institutit për Studime të Luftës.

Analistët e ISW parashikojnë se luftimet do të vazhdojnë jo vetëm në jug, por edhe rreth qytetit Bakhmut në rajonin lindor të Donetskut, i vetmi vend ku forcat ruse janë ende duke u përpjekur të sulmojnë dhe kapin territorin.

Sa i përket rajonit verior të Luhanskut, forcat ukrainase vazhdojnë të kryejnë një kundërsulm atje, njoftoi ISW.

Në fjalimin e tij të rregullt mbrëmë, presidenti ukrainas Volodymyr Zelensky tha se 41 vendbanime në jug të Ukrainës janë çliruar. Ai gjithashtu theksoi se një numër i paspecifikuar i ushtarëve ukrainas u vranë në luftime.

“Sot kemi një lajm të mirë nga jugu. Por edhe pse jemi të gëzuar, tani dhe përgjithmonë duhet të kujtojmë se çfarë do të thotë kjo lëvizje, çdo hap i forcave tona mbrojtëse përfaqëson jetët e dhëna për lirinë e ukrainasve”, tha Zelensky.

Zyrtarët ukrainas thanë më parë se vetëm dje u çliruan 12 vendbanime.

Ushtarët rusë braktisin shokët e plagosur ndërsa tërhiqen nga Kherson, transmeton Daily Telegraph.

“Rusët tërhiqen në pozicione më të larta, të fortifikuara. Por ka ende luftime në zonat e banuara. Ata po tërhiqen sepse po pësojnë humbje të mëdha. Madje, as ushtarët e plagosur nuk i marrin me vete, por i lënë pas”, ka thënë për Telegraph-in Nikolai, ushtar ukrainas.

Ukraina ka konfirmuar se forcat e saj kanë pastruar “dhjetëra vendbanime të minuara dhe fshatra të braktisura nga trupat ruse në Ukrainën jugore” ndërsa forcat e tyre i afrohen qytetit strategjik të Khersonit.

Në fjalimin e tij të natës të enjten në mbrëmje, udhëheqësi ukrainas Volodymyr Zelensky tha se “dhjetëra flamuj ukrainas tashmë janë kthyer në vendin e tyre të duhur”.

“Kemi lajme të mira nga jugu i Ukrainës. Janë çliruar 41 vendbanime”, tha ai.

Siç tha dje ministri ukrainas i Mbrojtjes Oleksiy Reznikov, do të duhen të paktën shtatë ditë që ushtria ruse të tërhiqet nga Kherson.

“Rusia ka ende 40,000 ushtarë në rajon dhe të dhënat e inteligjencës tregojnë se forcat e saj mbeten në qytet dhe rrethinat e tij. Nuk është e lehtë të tërheqësh trupat brenda dy ditësh”, tha ai.