Hamasi po lufton për mbijetesën kundër një Izraeli hakmarrës, i cili zotohet ta zhdukë organizatën dhe ka nisur një sulm hakmarrës në Gaza që i ka marrë jetën më shumë se 11,000 palestinezëve.
Të gjendur të vetëm përballë një furie si ajo e IDF-së, liderët e Hamasit vazhdimisht i kanë bërë thirrje botës Arabe që të bashkohen në një front përballë Tel Avivit.
Më 7 tetor, komandanti ushtarak i Hamasit, Mohammed Deif, u bëri thirrje aleatëve të tij në bosht që t’i bashkohen luftës.
“Vëllezërit tanë në rezistencën islamike në Liban, Iran, Jemen, Irak dhe Siri, kjo është dita kur rezistenca juaj bashkohet me popullin tuaj në Palestinë”, tha ai në një mesazh audio.
Por thirrja e tij duket se nuk mori përkrahjen që Hamasi priste dhe zhgënjimin e shprehu më 16 tetor, Khaled Meshaal, i cili në një intervistë televizive falënderoi Hezbollahun libanez për veprimet e deritanishme, por tha se “beteja kërkon më shumë“.
Për t’i dhënë zë “braktisjes” së Hamasit ka menduar lideri i kësaj aleance, Irani, që nuk do të ndërhyjë drejtpërdrejt në konflikt nëse nuk sulmohet vetë nga Izraeli ose Shtetet e Bashkuara.
Sipas agjencisë së lajmeve Reuters, lideri suprem i Iranit Ajatollah Ali Khamenei i dha një mesazh të qartë kreut të Hamasit Ismail Haniyeh, kur ata u takuan në Teheran në fillim të nëntorit, se Irani do të vazhdojë t’i japë grupit mbështetjen e tij politike dhe morale, por nuk do të ndërhyjë drejtpërdrejt në konflikt.
Sipas tre zyrtarëve të lartë në Teheran, të cilëve iu referohet Reuters, Khamenei ka thënë: “Ju nuk na dhatë asnjë paralajmërim për sulmin tuaj të 7 tetorit mbi Izraelin dhe ne nuk do të hyjmë në luftë në emrin tuaj”.
Udhëheqësi suprem po ashtu i ka bërë presion Haniyehut që t’i shuajë zërat e grupit palestinez që i bën thirrje publikisht Iranit dhe aleatit të tij të fuqishëm libanez Hezbollah që t’i bashkohen betejës kundër Izraelit me forcë të plotë.
Sundimtarët klerikë të Iranit planifikojnë të vazhdojnë të përdorin rrjetin e tyre të boshtit të aleatëve të armatosur, duke përfshirë Hezbollahun, për të nisur sulme me raketa dhe drone ndaj objektivave izraelitë dhe amerikanë në të gjithë Lindjen e Mesme, por refuzojnë përfshirjen e forcave të tyre në konflikt.
Tre burime pranë Hezbollaut kanë treguar po ashtu për Reuters se edhe ata janë befasuar nga sulmi i Hamasit që vrau 1200 izraelitë. Luftëtarët libanezë nuk ishin as në gatishmëri në fshatrat afër kufirit që ishin vija e frontit në luftën e Hezbollaut me Izraelin në vitin 2006 dhe duhej të thirreshin me shpejtësi.
“Ne u zgjuam nga një luftë“, tha një komandant i Hezbollahut.
Kriza e shpalosur shënon herën e parë që i ashtuquajturi “Boshti i Rezistencës” – një aleancë ushtarake e ndërtuar nga Irani gjatë katër dekadave për të kundërshtuar fuqinë izraelite dhe amerikane në Lindjen e Mesme është mobilizuar në disa fronte në të njëjtën kohë.
Hezbollahu është përfshirë në përleshjet më të rënda me Izraelin për gati 20 vjet. Milicitë e mbështetura nga Irani kanë shënjestruar forcat amerikane në Irak dhe Siri ndërsa Huthët e Jemenit kanë lëshuar raketa dhe drone në Izrael.
Konflikti po teston gjithashtu kufijtë e koalicionit rajonal, anëtarët e të cilit – që përfshijnë qeverinë siriane, Hezbollahun, Hamasin dhe grupe të tjera militante nga Iraku në Jemen – kanë prioritete të ndryshme dhe sfida të brendshme.
