Irani kërcënon SHBA-të: “Bazat amerikane janë objektiva legjitime”

Tensionet mes Shteteve të Bashkuara dhe Iranit janë përshkallëzuar ndjeshëm, pasi kryetari i Parlamentit iranian, Mohammad Bagher Qalibaf, paralajmëroi se çdo ndërhyrje amerikane do t’i bënte “të gjitha bazat dhe forcat amerikane në rajon objektiva legjitime”.

Në një postim në platformën X, Qalibaf reagoi ndaj deklaratës së presidentit amerikan Donald Trump, i cili të premten u zotua se SHBA do të ndërhynte nëse autoritetet iraniane do të qëllonin ose do të vrisnin protestues paqësorë.

“Nëse Irani vret protestues paqësorë, siç është zakoni i tyre, Shtetet e Bashkuara të Amerikës do t’u vijnë në ndihmë. Ne jemi gati dhe të përgatitur”, shkroi Trump në një postim gjatë natës në Truth Social.

Zyrtarë të lartë iranianë reaguan menjëherë, duke paralajmëruar se çdo ndërhyrje e SHBA-ve do të sillte kaos rajonal dhe do të ekspozonte forcat amerikane në Lindjen e Mesme ndaj sulmeve.

Këshilltari i udhëheqësit suprem Ali Khamenei, Ali Shamkhani, deklaroi se “çdo dorë ndërhyrjeje që i afrohet sigurisë së Iranit, nën çfarëdo preteksti, do të pritet përpara se të veprojë”.

Këto zhvillime vijnë ndërsa protestat në Iran janë përshkallëzuar ditët e fundit, duke kaluar nga demonstrata ekonomike në përplasje të dhunshme.

Sipas një organizate për të drejtat e njeriut, të paktën shtatë persona kanë humbur jetën, ndërsa një agjenci gjysmëzyrtare iraniane raporton për të paktën tre viktima.

Protestat nisën të dielën në Teheran, pas rënies së monedhës iraniane në nivelin më të ulët historik ndaj dollarit dhe rritjes së ndjeshme të çmimeve.

Më pas, ato u përhapën edhe në qytete më të vogla dhe morën një karakter më politik, me slogane kundër regjimit klerikal dhe liderit suprem Ayatollah Ali Khamenei.

Ekonomia iraniane është goditur rëndë nga vitet e sanksioneve ndërkombëtare dhe nga një konflikt 12-ditor me Izraelin verën e kaluar, gjatë të cilit SHBA sulmoi edhe objektiva bërthamore iraniane.