Ish-eurodeputeti britanik, Nigel Farage, i ka etiketuar si qenër, qytetarët shqiptarë, të cilët kanë protestuar në Britaninë e Madhe pas deklaratave nga sekretarja e Punëve të Brendshme, Suella Braverman, e cila i ka cilësuar emigrantët shqiptarë si “pushtues”.
“Ky vend po i shkon qenërve dhe politikanët tanë duhen fajësuar. Kjo çfarë po ndodh në Londër sot, është një turp”, shkruan Farage në profilin e tij në Twitter.
Kjo, bashkëngjitur me një video të një shqiptari, i cili në statujën e Winston Churchill, ka vendosur edhe flamurin shqiptar.
Ndër të tjera, një pyetje, Farage ia shtron edhe vetë Braverman-it.
“Çfarë do të bëni për këtë gjë Braverman”, e pyet ai sekretaren britanike.
Rreth 3 mijë e 500 shqiptarë, e kanë kundërshtuar deklaratën e Braverman përmes protestave në Londër, ndaj edhe reagimi i Farage.
Mirëpo, në vetvete, kjo demonstratë ka qenë legjitime, pasi në të është bërë thirrje kundër diskriminimit dhe bullizmit, duke shtuar këtu faktin se shqiptarët në Britani kanë kërkuar dorëheqjen e Braverman nga posti që mban.
“Suella duhet të dërgohet në Ruandë”, shkruhej në një prej pankartave, duke ironizuar kështu sekretaren e brendshme, plani i të cilës është të dërgojë emigrantët e ardhur në Britani drejt burgjeve në Ruandë, për të dekurajuar kështu iniciativat e të huajve për të ndërmarrë rrugë ilegale për shkuarjen drejt Anglisë.
Teksa Farage, njihet për qasjet e tij tejet radikale kundër emigrantëve si edhe ka qenë kryetar i Partisë për Brexit, para se procesi të përmbyllej me referendumin pro daljes nga eurozona.
Farage ka qenë ndër zërat kryesorë, të cilët e kanë shtyrë popullin britanik të votojë pro këtij fakti.
