Ish-këshilltari i Thaçit, i dyshuar se ishte agjent i BIA-s – Bëhet deputet i Kuvendit të Kosovës

Branislav Nikoliq, i cili më parë kishte qenë këshilltar i presidentit Hashim Thaçi, ka arritur ta sigurojë një ulëse në Kuvendin e Republikës së Kosovës.

Nikolic ka arritur të marrë 14 mijë e 467 vota në kuadër të Listës Serbe duke arritur të bëhet deputet në legjislaturën e shtatë.

Ai kishte punuar si këshilltar i presidentit Hashim Thaçi që nga viti 2016. Të njëjtin, para se të emëronte si këshilltar të tij, Thaçi e pati emëruar si anëtar të bordit në postë. Mirëpo më pas, Thaçi kishte marrur vendim që ta shkarkoj Nikoliqin, pasi që dyshohet se ishte pjesë e BIA-s.

Zyra e Presidentit në njoftimin për shkarkimin e tij është arsyetuar se nuk kishte qenë në dijeni se Nikoliq kishte qenë në Agjencinë e Inteligjencës së Serbisë (BIA), shkruan Insajderi.

“Zyra e Presidentit të Republikës së Kosovës konfirmon se nuk ka pasur asnjë informacion paraprak dhe zyrtar nga institucionet e sigurisë në Kosovë për përfshirjen e mundshme të z. Branislav Nikolic në aktivitete të dyshimta, për të cilat është raportuar në media. Përkundër kësaj, Zyra e Presidentit i merr seriozisht raportimet e mediave për përfshirjen e mundshme z. Nikolic në aktivitete të dyshimta, qofshin ato të natyrës kriminale ose që cenojnë sigurinë kombëtare. Nisur nga parimi i respektimit të ligjit dhe për t’i dhënë hapësirë autoriteteve të sigurisë që të kryejnë hetime të pavarura për këtë rast, Presidenti i Republikës së Kosovës, Hashim Thaçi, bazuar në kompetencat e tij kushtetuese dhe ligjore, ka liruar sot nga detyra e Këshilltarit Politik, z. Branislav Nikolic​”, thuhet në njoftimin nga Zyra e Presidentit.

Bratislav Nikoliq kishte qenë anëtar i SLS-së për t’iu bashkuar partisë tjetër serbe në Kosovë, Listës Serbe.