Ish-presidenti Topi: Tirana bëri gabime të mëdha, Rama i hapi rrugën Vuçiçit

Ish-Presidenti i Shqipërisë, Bamir Topi thotë se, Tirana dhe Prishtina kanë bërë gabim të mëdha në politikën e jashtme. Gjatë intervistës në “Ilva Now”, z. Topi tha se, këto gabime kanë të bëjnë me politikën e jashtme në rajon dhe sidomos në marrëdhënie me Serbinë.

“Janë bërë gabime të mëdha në politikën e jashtme sidomos për politikën në rajon në marrëdhënie me Serbinë dhe Kosovën”, tha Topi duke iu referuar dhe idesë së minishengenit, ku shtoi se, “problemi është se filozofia dhe metodologjia ka qenë totalisht e gabuar”.

“Të shkosh në Beograd nuk është herezi, por jo të shkosh pa u konsultuar me faktorin shqiptar në Kosovë. Në ditët e sotme po ridel një tezë e Boris Tadiç, që pas vitit 2008 filloi të artikuloi se problemet Serbi-Kosovë duhet t’i zgjidhë Shqipëria. Por, Kosova ka autonominë dhe të drejtën të futet në diskutime dhe ne nuk mbajmë qëndrime parentaliste”, nënvizoi ish-presidenti.

Sipas Bamir Topit, i fituar nga kjo histori ka dalë Presidenti i Serbisë, Aleksandër Vuçiç, i cili nga një situatë e vështirë në arenën ndërkombëtare tashmë ndihet komod pasi ka forcuar lidhjet me Kinën dhe Rusinë ndërsa me SHBA ka një gjendje të ngrirë.

“Vuçiç për hir të së vërtetës ka luajtur shumë mirë. Ka ardhur fletëthirrja në momentin kur është rikonfirmuar me mbi 60% të votave. Nëse do të kishte gabuar në raport me Kosovën do ta kishin dërrmuar. Ka aktivizuar lidhe të forta me Kinën dhe Rusinë dhe ka gjendje stand by me SHBA”, tha ai.

Ish-presidenti madje shtoi se meritë që Vuçiç ndodhet në këto pozita favorizuese ka dhe kryeministri, Edi Rama. “Në mënyrë specifike z. Rama më shumë i ka hapur rrugë që Vuçiç të jetë një lider i preferuar në Evropë”, tha Topi.

Sipas tij kjo nuk është bërë me qëllim por nga padituria e marrëdhënieve politike dhe ndjenja ekzibicioniste e Ramës për të marrë një flamur që është shumë i vështirë për t’u mbajtur.

Duke iu referuar dhe përçarjeve të thella në politikën e Kosovës, por edhe në Maqedoninë e Veriut, z. Topi tha se, shqiptarët kanë treguar një amatorizëm për çështjen shqiptare.

“Politika ka treguar amatorizëm për çështjen shqiptar. Nuk bëhet duke bërë deklarata, por kërkon motivacion të fortë, modesti, të forcosh lidhjen me partnerët. Thirrjet nuk mjaftojnë vetëm në ditë të keqe, se në të ditë të keqe jepen nga halli”, tha ai.

Ndërsa sa i takon politikës së jashtme në Evropë, Topi tha se, Shqipëria ka krijuar “kundërshtarë” në Evropë duke përmendur një prej tyre Francën. Sipas tij, Shqipëria ka miq të rëndësishëm në Evropë, por partneri kryesor ka qenë dhe mbetet SHBA.

“Janë disa vende në Evropë që sa përmenden shqiptarët kthejnë shpinnë. Nuk paragjykoj marrëdhënien Francë-Serbi sepse është një marrëdhënie historike. Por që asnjë zyrtar i lartë francez nuk kanë vizituar asnjëherë Shqipërinë në 60 vite, atëherë prit se duhet bërë një analizë më e thellë”, deklaroi ish-presidenti.

Lidhur me aktakuzën ndaj Presidentit të Kosovës, Hashim Thaçi, ai tha se, ajo mbetet për t’u legalizuar nga pikëpamja juridike. Ai i cilësoi akuzat ndaj UÇK-së si fantazi dhe absurde. Por, Topi sërish kritikat i drejton nga vetë shqiptarët duke thënë se, politika në Kosovë ka harruar kauzën e madhe dhe po luftojnë për interesa të ngushta.

Ish-presidenti mohoi të ketë pasur dijeni për një raport të një ish-admirali turk lidhur me marrëveshjen për detin në vitin 2007, ndërsa tha se e kishte kontestuar në mënyrë deklarative këtë kontratë pa pasur mundësinë ta kontestonte me firmë pasi me këtë marrëveshje ishin shkelur procedurat kushtetuese duke anashkaluar presidentin.

“Nuk më erdhi rasti për ta kontestuar, e kam kontestuar në mënyrë deklarative, sepse patën filluar negociata pa marrë plotfuqinë nga presidenti. Ka një rregull kushtetues, që në rast se nuk merret në konsiderate çdo procedurë konsiderohet nul. Në ato kohë marrëveshjen e çoi në Kushtetuese opozita dhe ka qenë një vendim shumë i argumentuar për të cilën më vonë të gjitha palët e kuptuan se marrëveshja nuk kishte funksionuar”, tha ish-presidenti.