Izraeli në alarm maksimal mes sinjaleve për ndërhyrje amerikane në Iran

Ushtria izraelite është vendosur në alarm të lartë, për shkak të rrezikut të një sulmi parandalues nga Irani, në sfondin e asaj që përshkruhet si një koordinim i mundshëm izraelito-amerikan kundër Teheranit, raportojnë media izraelite.

Sipas Channel 13 dhe Haaretz, Izraeli ndodhet sonte në gjendje gatishmërie të shtuar, pas pamjeve që vijnë nga Irani dhe deklaratave kërcënuese të presidentit amerikan Donald Trump.

Sipas tyre, vlerësimet e sigurisë lidhen me mundësinë që Irani të reagojë ushtarakisht përpara çdo veprimi të jashtëm kundër tij.

Paralelisht, gazeta Haaretz raporton se ushtria izraelite ka rritur nivelin e vigjilencës në disa fronte, nga shqetësimi se përshkallëzimi i protestave në Iran dhe retorika amerikane mund të nxisin Teheranin drejt veprimeve të paparashikueshme.

Më 10 janar, presidenti amerikan Donald Trump deklaroi se Shtetet e Bashkuara janë “gati të ndihmojnë” popullin iranian dhe paralajmëroi autoritetet në Teheran se, nëse protestuesit do të vriteshin, Washington-i do të ndërhynte dhe do t’i “godiste shumë fort”, edhe pa dërgimin e trupave tokësore.

Nga ana e tij, Udhëheqësi Suprem i Iranit, Ali Khamenei, shkroi të shtunën në rrjetin social X: “Me vullnetin e Zotit, populli iranian së shpejti do ta shijojë fitoren”.

Raportime për viktima mes protestave
Ndërkohë, mjekë iranianë kanë raportuar qindra viktima si pasojë e përplasjes së forcave të sigurisë me protestuesit, ndërsa demonstratat kanë hyrë në ditën e 14-të dhe janë përhapur në disa qytete.

Një mjek nga Teherani i tha revistës Time, në kushte anonimiteti, se disa spitale në kryeqytet kanë regjistruar mbi 200 të vdekur, shumica si pasojë e përdorimit të municioneve reale.

Raportime të ngjashme janë bërë edhe për qytete të tjera, ndërsa organizata joqeveritare HRANA ka konfirmuar mbi 100 viktima dhe mijëra të ndaluar.

Autoritetet iraniane nuk kanë publikuar shifra zyrtare dhe kanë akuzuar Shtetet e Bashkuara dhe Izraelin për nxitjen e trazirave, duke paralajmëruar se forcat e sigurisë dhe gjyqësori “nuk do të tregojnë asnjë tolerancë ndaj sabotatorëve”.