“Je si Millosheviçi që vrau shqiptarët”, Walker ‘shpërthen’ ndaj Vuçiç: Më vjen turp! E vërteta e shqiptarëve duhet të dëgjohet

Ish-ambasadori i OSBE-së në Kosovë, William Walker, është shprehur në emisionin “Off the Record” me gazetarin Andrea Danglli në A2 CNN se i frikësohet Beogradit, Presidentit serb Aleksandër Vuçiç dhe zyrtarëve të tjerë që vijojnë të mohojnë përgjegjësinë e vendit të tyre për masakrën e Reçakut, gjatë luftës në Kosovë.

Walker tha se qeveria e Presidentit Vuçiç është e njëjtë me atë të Millosheviçit, i cili kryeu masakra të shumta mbi popullsinë civile në Kosovë.

Ai shtoi gjithashtu se po botonte një libër për të vërtetat e asaj që ndodhi në ato vite në Reçak, në mënyrë që e gjithë bota të mësonte të vërtetën e ngjarjes.

Sipas Walker, Serbia kishte bërë gjithçka për të manipuluar sulmin mbi popullsinë civile në ato vite, duke u justifikuar para faktorit ndërkombëtar se në Reçak kishte pasur një luftë mes UÇK-së dhe ushtrisë e policisë serbe.

“Kam dëgjuar shumë përshkrime të asaj që ndodhi në Reçak. Kam frikë nga Beogradi. Kryesisht kam frikë nga Vuçiç dhe njerëz të tjerë që janë në linjën e makinerisë propagandistike serbe dhe vijojnë të mohojnë përgjegjësinë e Beogradit për atë që ndodhi atë ditë.

Mendoj se është e rëndësishme që zëri i shqiptarëve me pak mbështetje nga unë të dëgjohet. Dhe ky është qëllimi i librit. Më vjen turp që kam pritur 25 vite për ta shkruar dhe botuar. Por mendoj se po del në përvjetorin, 26 vjetorin e masakrës në Reçak. Mendoj se ka njëfarë kuptimi në vetëvete. Unë mendoj se qeveria e Beogradit është qeveria që ishte atje gjatë ngjarjeve në Reçak. Qeveria e Millosheviçit dhe ajo e Vuçiç janë shumë të ngjashme.

Reçaku ishte një nga dhjetëra masakrat që unë di. Unë nuk mendoj se populli serb është i gatshëm që të besojë se unë kam qenë agjent i CIA-s. Më 16 janar, pak pasi ndodhi masakra, unë dola i tregova botës atë që kisha parë. Kjo nuk ishte në përputhje me atë që po thoshte qeveria serbe, duke pretenduar se kishte një betejë mes UÇK-së, ushtrisë e policisë serbe”, tha Walker, shkruan A2 CNN.