Marrja e medaljes presidenciale të nderit në Izrael nga Edi Rama është shoqëruar me kritika në rrjetet sociale për shkak të situatës në Gaza.
Në përgjigje të një ndjekësi i cili i tha se “ke humbur shumë me atë që bëre me Izraelin”, Rama sqaroi se medalja është në emër të popullit shqiptar që mbrojtën hebrenjtë gjatë luftës së dytë botërore. Ndërsa sa i përket situatës aktuale, kreu i qeverisë theksoi se Shqipëria është në të njëjtën linjë me Bashkimin Europian dhe se qëndrimi i tij është për zgjidhje mes dy shteteve.
“Kam humbur shumë pse mora një medalje nderimi në emër të Shqipërisë dhe popullit shqiptare që ishte e merituar për Shqipërinë dhe shqiptarët dhe e vonuar? Për këtë humba shumë? Sa i përket atyre që e lidhin këtë me qëndrimin ndaj situatës në Gaza, do thuash thosha t’i referohen qëndrimet publike të Shqipërisë në Kombet e Bashkuara ku kemi qëndruar në vijimësi në të njëjtën linjë me BE, ku e kemi kërkuar armëpushimin shumë e shumë herë dhe kohë përpara se të ndodhte. E dyta, ti referohem qëndrimeve të vazhdueshme për domosdoshmërinë e pranimit të zgjidhjes me dy shtete dhe njohjen e shtetit të Palestinës dhe ti referohen fakteve jo emocioneve të pakuptimta në këtë rast sepse është vlerësim për popullin shqiptar dhe të gjithë ata që i dhanë mësim Evropës dhe botës në një moment dramatik, ishin shqiptar që pa dallim fetar, u bënë mburojë e hebrenjve. Një mësim në histori që askush nuk duhet ta harrojë. Sa i përket shkulmave dhe mllefeve në emër të besimit të gjithë atyre që i kanë dhe vuajnë nga këto u sugjeroj të lexojnë më shumë profetin. Unë personalisht i referohem herë pas here librave të shenjtë Biblës dhe Kuranit, se janë burim i jashtëzakonshëm lehtësimi dhe ushqimi i vetëpërmbajtjes.”
