Këmbëkryq rreth Kishës, Kuvendi i Burrave në Theth thirrje qeverisë: Mos na prish shtëpitë, jemi për paqe, jo shkatërrim

Fadromat e Inspektoriatit Kombëtar për Mbrojtjen e Territorit (IKMT) vijojnë për të shtatën ditë radhazi prishjen e ndërtimeve pa leje në Parkun Kombëtar të Thethit. Deri më tani, sipas burimeve zyrtare, janë shembur 70 objekte që nuk dispononin dokumentacion të rregullt ndërtimi.

Ndërhyrja e IKMT-së ka sjellë jo pak tension në zonë. Një ditë më parë, situata eskaloi kur një grup personash tentuan të digjnin një urë dhe hodhën bomba molotov në drejtim të një prej fadromave, duke rrezikuar jetën e punonjësve. Si pasojë e këtij incidenti, gjatë së shtunës është shtuar ndjeshëm prania e Policisë së Shtetit në territor.

Në përgjigje të situatës së krijuar, banorët e Thethit janë mbledhur në një kuvend tradicional pranë Kishës së fshatit. Të ulur këmbëkryq, përfaqësuesit e familjeve dhe burrat e Dukagjinit diskutuan për qëndrimin që do të mbajnë përballë ndërhyrjeve të shtetit. Pamjet nga vendngjarja tregojnë një mobilizim të rrallë të komunitetit, ngjashëm me organizimet e dikurshme në raste të jashtëzakonshme.

Sipas banorëve, shumë prej strukturave të ndërtuara u kanë shërbyer vizitorëve që vijnë në zonë, duke u bërë një burim i rëndësishëm ekonomik për familjet vendase. Ata pretendojnë se nuk kanë pasur mundësi reale për të legalizuar ndërtimet për shkak të kufizimeve që lidhen me statusin e mbrojtur të parkut.

Ndërkohë që situata paraqitet më e qetë këtë të diel, mbetet e paqartë se si do të zhvillohet më tej dinamika mes institucioneve shtetërore dhe komunitetit lokal, veçanërisht nëse prishjet do të vijojnë edhe në ditët në vijim.

Autoritetet qendrore nuk kanë dhënë ende një deklaratë të re zyrtare pas incidenteve të fundit, ndërsa përfaqësues të banorëve kanë kërkuar dialog me instancat përkatëse për të gjetur një zgjidhje që mbron njëkohësisht mjedisin dhe interesat e komunitetit.