Këpucë gjigante të gjetura pranë Murit të Hadrianit nxisin mister rreth ushtarëve të Romës së lashtë

Një mister romak i lashtë po shpaloset në kodrat e buta të veriut të Britanisë, shkruan CNN.

Arkeologët kanë zbuluar një depo këpucësh jashtëzakonisht të mëdha në rrënojat e një fortese ushtarake të shekullit të parë përgjatë Murit të Hadrianit, një mur prej guri 117 kilometra i gjatë që dikur mbronte kufirin veriperëndimor të Perandorisë Romake nga pushtuesit e huaj. Zbulimi po ngre pyetje të reja mbi jetën dhe origjinën e banorëve të fortesës.

Tabanët prej lëkure të këpucëve gjigante u gjetën në Fortesën Magna në maj, mes 34 copë këpucësh, përfshirë çizme pune dhe këpucë të vogla për foshnja, që po ndihmojnë të krijohet një tablo e 4,000 burrave, grave dhe fëmijëve që dikur jetonin në dhe rreth kësaj zone në Angli, vetëm në jug të kufirit me Skocinë.
Tetë nga këpucët janë më të gjata se 30 centimetra – një madhësi 13.5 ose më e madhe sipas tabelës së përmasave të Nike për burrat në SHBA – gjë që i bën ato më të mëdha se mesatarja e sotme dhe ngre dyshime se trupa jashtëzakonisht të gjatë mund të kenë ruajtur këtë fortesë të veçantë në kufirin e perandorisë.

Në kontrast, madhësia mesatare e një këpuce të lashtë të gjetur në një fortesë romake fqinj ishte afër një madhësie 8 për burrat në SHBA, sipas një njoftimi për shtyp mbi zbulimin.

“Kur këpuca e parë e madhe filloi të dilte nga toka, po kërkonim shumë shpjegime, si për shembull ndoshta ishin këpucët e tyre të dimrit, ose ndoshta i kishin mbushur ato, ose mbanin çorape shtesë”, kujton Rachel Frame, një arkeologe e lartë që udhëheq gërmimet. “Por ndërsa gjetëm më shumë dhe me stile të ndryshme, duket se këto ishin thjesht njerëz me këmbë vërtet të mëdha.”

Ndërsa gërmimet vazhdojnë në Fortesën Magna, Frame tha se shpreson që hetimet e mëtejshme të mund të zbulojnë se kush saktësisht i kishte veshur këto këpucë gjigante. Një skicë themelore e së kaluarës së vendit sapo ka filluar të marrë formë.