Kina kërkon nga NATO t’i kërkojë falje Serbisë dhe 4 vendeve të tjera

Kina ka kërkuar nga NATO që t’u kërkojë falje disa vendeve, përfshirë edhe Serbisë, për siç thuhet “jetët e humbura nga luftërat”

Lijian Zhao, drejtor i Departamentit të Informacionit në Ministrinë e Punëve të Jashtme të Kinës, ka dalë me një postim në Twitter, ku ka vënë edhe disa foto nga luftërat e ndryshme në Irak, Siri, Libi e Afganistan.

“NATO duhet t’i kërkojë falje Serbisë, Irakut, Libisë, Sirisë e Afganistanit për 900,000 jetët e humbura nga luftërat dhe për dhjetëra miliona refugjatë”, thuhet në postimin e Zhaos më 18 korrik.

Kina na vazhdimësi ka mbajtur anën e Serbisë, megjithëse për luftën që i referohet, Serbia ishte ajo që e nisi, shkaktoi masakra të shumta e dëboi gati një milion shqiptarë nga Kosova. NATO ndërhyri ndaj caqeve ushtarake serbe vetëm pasi Beogradi zyrtar nuk u bind të nënshkruajë marrëveshjen për fundin e luftës.