Komisioneri ukrainas për të drejtat e njeriut: Po ndodh një gjenocid, rusët kanë deportuar 20 mijë fëmijë

Komisioneri për të drejtat e njeriut në Ukrainë, Dmytro Lubinets, deklaron se krimet e kryera nga Rusia në territoret e pushtuara përbëjnë “gjenocid të mirëfilltë” ndaj popullit ukrainas. Në një intervistë për mediat italiane, ai thotë se provat e torturave, deportimeve, dhunës seksuale, vrasjeve të civilëve dhe rrëmbimit të fëmijëve janë të shumta dhe të dokumentuara prej vitesh.

Sipas Lubinets, Rusia po godet qëllimisht infrastrukturën energjetike për të lënë popullatën pa ngrohje dhe energji gjatë dimrit, duke rritur numrin e viktimave civile. Ai nënvizon se vetëm në muajin shtator sulmet janë rritur me 31%, duke shkaktuar 214 të vrarë dhe mbi 900 të plagosur. Në tërësi, Ukraina raporton mbi 14 mijë civilë të vrarë dhe mbi 37 mijë të plagosur në zonat nën kontrollin e Kievit, ndërsa numri i viktimave në Mariupol dhe territoret e pushtuara mbetet i panjohur.

Lubinets thekson se “dhomat e torturës” të zbuluara në Bucha janë pjesë e një sistemi të ngritur nga Rusia që prej vitit 2014, me qendra paraburgimi dhe kampe filtrimi ku civilët torturohen dhe zhduken. Ai përmend gjithashtu politikat e dhunës seksuale dhe shtatzënive të detyruara si pjesë të kritereve të genocidit.

Një nga akuzat më të rënda lidhet me deportimin masiv të fëmijëve ukrainas. Komisioneri thotë se 1.5 milionë fëmijë ndodhen nën pushtim rus dhe se Moska ka pranuar vetë se mbi 733 mijë fëmijë janë në territorin rus. Deri tani, Ukraina ka arritur të rikthejë 1 mijë e 777 prej tyre, ndërsa provat e sigurta flasin për të paktën 19 mijë e 546 fëmijë të deportuar — por numri real mund të jetë shumë më i lartë.

“Rusët pushtojnë territore, marrin fëmijët ukrainas dhe i rusifikojnë. I detyrojnë të flasin rusisht, i nënshkruajnë në programe militarizimi, u ndryshojnë dokumentet dhe i fusin në organizata paramilitare. E gjithë kjo ka një qëllim të vetëm: të shkatërrojë etninë ukrainase, si në territoret e pushtuara ashtu edhe në ato të kontrolluara nga Kievi”, tha ai.

Lubinets rrëfen edhe përvojën personale me luftën, duke theksuar se lufta për Ukrainën është një betejë ekzistenciale.

“O fitojmë, o vdesim”, thotë ai, duke falenderuar vendet perëndimore për mbështetjen dhe duke theksuar se kjo luftë është për të gjithë botën demokratike.