Konjufca: Raportet me Ramën janë lënduar, por me Kurtin do të takohet së shpejti

Kryeparlamentari Glauk Konjufca deklaroi se raportet e kryeministrit Albin Kurti, me kryeministrin e Shqipërisë, Edi Rama, janë lënduar, por sipas tij, nuk janë acaruar sa për të mos u takuar.

Ai tha para mediave të enjten se Kurti do ta takojë “së shpejti” Ramën, pasi sipas tij, kjo duhet të shihet nga pikëvështrimi i interesit mes dy vendeve.

“Kjo do të rregullohet se shpejti, ata do të takohen së shpejti”, tha ai.

“…Kosova gjithmonë ka bërë hapa gjigantë në kauzën e vet, në çdo kohë, për sa kohë që Republika e Shqipërisë i ka qëndruar prapa. Mua më kujtohen vetëm 2-3 momente nga vitet e 90-ta, edhe gjatë kohës së presidentit Rugova, ku Shqipëria i ka dalë kundër Kosovës. Ato kanë qenë raste shumë të rralla”, deklaroi Konjufca.

Kryetari i Kuvendit i përmendi “krizat” që sipas tij, Kosova i ka pasur me Shqipërinë

“Vetëm një moment ose 2 kanë qenë momente krizash, kur kryeministri shqiptar i ka dalë kundër presidentit ose ministrave… ne patëm një krizë në 2017-n, kur u duk se sikur për Kosovën, edhe Republika e Shqipërisë po është në anën e shkëmbimit territorial. Mendoj se kjo e dëmtuar Republikën e Kosovës. Mendoj se e ka dëmtuar edhe ideja e ‘Ballkanit të Hapur’. Sepse ky është dallim nga ajo që ka nevojë Kosova. E tash e treta është kjo që po e dëmton Republikën e Kosovës, kur ne jemi në të drejtën tonë dhe ku nuk po na kupton as Republika e Shqipërisë. Prej kësaj nuk ka gjëra pozitive, me këto pozicione Kosova mundet vetëm të dëmtohet”.

Konjufca tha se marrëveshjet mes dy vendeve po nënshkruhen.

“Element i sotëm që ka dashur të përçojë Qeveria e Kosovës ka qenë një porosi minimaliste. Ministrat i nënshkruan marrëveshjet…Krerët më të lartë të shtetit e pritën. Janë dakorduar, marrëveshjet i kemi por ishte dëm i madh që s’u bë në mbledhjen e qeverive. Ishte ide e kryeministrit (Kurtit) që kjo të kalojë sot kështu. Mirëpo edhe z.Ramën e pritën figura më të larta shtetërore. Po të kishte diçka shumë shtetërore kundër tij nuk do ta prisnim edhe ne”, shtoi ai para gazetarëve.