Kreu i ekzekutivit, Albin Kurti ka thënë sot në Kuvend nuk ka zbrazje të Kosovës, por, ka emigrim.
Ai tha as pas 1 janarit kur qytetarët do të lëvizin pa viza nuk do të ketë zbrazje.
“Unë nuk mendoj që po zbrazet Kosova, ka emigrim por nuk ka zbrazje të Kosovës dhe nuk do të ketë as pas 1 janarit. Ju e dini se ata që do të shkojnë tash pa viza në zonën Shengen duhet të kthehen”, deklaroi Kurti.
Tutje, Kurti tha se zotim kryesor si qeveri e kanë pasur punësimin dhe drejtësinë.
“Për më pak se 3 vjet ka më shumë se 16% rritje të punësimit. Sa i përket drejtësisë është e vërtetë që aty kemi edhe më tutje pengesa ndonëse sundimi i ligjit e sidomos luftimi i krimit e korrupsionit është vërtetuar edhe nga organizata prestigjioze që Kosova qëndron më së miri në Ballkanin Perëndimor”, u shpreh kryeministri.
Po ashtu, kryeministri tha se gjatë qeverisjes së tij, ekonomisë i janë shtuar mbi 1 miliard euro për çdo vit, janë dyfishuar eksportet dhe investimet e huaja.
Ai tha se në vitin 2020, Bruto Produkti Vendor ka qenë 6.77 miliardë euro, ndërsa në vitin e ardhshëm do të jetë mbi 10 miliardë euro.
