Organizata e Veteranëve të Luftës së Ushtrisë Çlirimtare të Kosovës, dje kanë pranuar një propozim nga kryeministri i Kosovës, Albin Kurti, me anë të së cilit propozohet Ligji i ri për Verfikimin e Pjesëmarrësve në Luftë.
Këtë e ka konfirmuar për Sinjalin, Faton Klinaku, kryetari i Organizatës së Veteranëve të Luftës së Ushtrisë Çlirimtare të Kosovës.
Ai tha se propozimin e kanë marrë dhe ai do të shqyrtohet, e pastaj nga OVL do të përgjigjen me shkrim – duke shtuar se letra është vonuar për një muaj e gjysmë.
“Shkresën e kemi pranuar dje dhe do ta shqyrtojmë e pastaj do t’i përgjigjemi me shkrim. Do të diskutojmë me organet tona, letra është vonuar rreth një muaj e gjysmë. Në të flitet për një ligj të ri, por derisa të bëhet ai duhet të rritet paga minimale dhe krahas kësaj edhe pensioni i veteranëve”, u shpreh Klinaku.
Më 16 qershor, veteranët kanë mbajtur protestë, në shenjë pakënaqësie për mospërfshirjen e tyre në Ligjin e pagës minimale.
