Kurti para FSK-së thërret për unifikim të brendshëm e forcim nga jashtë

Kryeministri i Kosovës, Albin Kurti, ka thënë se do ta bëjnë shërbimin ushtarak të detyrueshëm sepse sipas tij, përvoja ushtarake nevojitet edhe në paqe.

Ai ka thënë se Kosova ka popull paqedashës i cili e ka mbrojtur lirinë e vet.

Kurti në fjalimin e parë drejtuar FSK-së që nga marrja e detyrës së kryeministrit ka shtuar se investimi në mbrojtje është i nevojshëm sepse ata që duan t’i bëjnë keq Kosovës ekzistojnë.

“Investimi në mbrojtje është një realitet në të cilin ekzistojmë. Është detyrë e jona ta forcojmë shtetin nga brenda e jashtë. Ne duhet të përballmi me kohen ashtu siç është, duke punuar ta bëjmë atë siç duam. E them këtë duke e ditur se në rajon paqja është brishtë. Askush as pas 20 vjetëve nuk e ka pranuar krimin e gjenocidin”, ka thënë ai.

Ai ka thënë se nuk duhet të ketë udhëheqës shtetërorë e të flasin ndryshe nga njëri-tjetri në politikën e jashtme.

“Si përfaqësues të shtetit duhet të jemi unik në politikën e jashtme. Dallimet e brendshme duhet të mbeten brenda. Ne duhet ta forcojmë vendin edhe nga brenda edhe nga jashtë, prandaj investimet në ushtri janë të nevojshme. Përderisa forcojmë ushtrinë do të forcojmë edhe ekonominë. Pasuria nuk duhet të pasurojë politikanët po popullin”, ka thënë ai.

Kurti ka thënë se pavarësia e liria nuk kanë kuptim pa drejtësi.

“Integrimi në Bashkimin Evropian është rrugë e gjatë dhe e mundimshme por është rrugë që na forcon. Atdheu është i yni, jemi në rrugë të drejtë sepse jemi në të drejtën tonë. Le t’ia shtrijmë dorën njëri-tjetrit edhe të pajtimit edhe të bashkimit”, ka thënë ai.