“Luftën e nisi Ukraina”- Boris Johnson për deklaratat e Trump: Kishte qëllim ‘shkundjen’ e Europës

Ish-kryeministri britanik Boris Johnson ka folur mbi pretendimet e rreme të Donald Trump se Ukraina filloi luftën me Rusinë dhe se pëlqyeshmëria e miratimit të Volodymyr Zelenskyy është vetëm 4%.

Sipas mediave të huaja, Johnson, i cili është pro-ukrainas dhe anti-BE, tha se komentet e Trump “nuk kishin për qëllim saktësinë historike të tyre”, por sipas tij, në vend të kësaj kishin për qëllim “të tronditnin evropianët për veprim”.

“Kur do të ndalojmë ne evropianët së skandalizuari për Donald Trump dhe do të fillojmë ta ndihmojmë atë për t’i dhënë fund kësaj lufte?”, postoi Johnson në rrjetin social ‘X’.

“Sigurisht që Ukraina nuk e nisi luftën,” shtoi ai, duke thënë se do të ishte si të pretendonit se SHBA-ja sulmoi Japoninë në Pearl Harbor.

Dhe ai hodhi poshtë pretendimin e Trump për pëlqyeshmërinë e Zelenskyt nga ukrainasit dhe sugjerimin e Presidentit të SHBA-ve që Ukraina të mbajë zgjedhje ndërsa ishte në luftë, duke vënë në dukje se Britania nuk e bëri këtë gjatë Luftës së Dytë Botërore. “Duhet të bëhemi seriozë”, tha ai më tej.

Sa i përket veprimeve që duhet të ndërmarrë Evropa, Johnson vuri në dukje 300 miliardë dollarë të aseteve të ngrira ruse, të vendosura kryesisht në Belgjikë, që “mund dhe duhet të përdoren për të paguar Ukrainën dhe për të kompensuar SHBA-në për mbështetjen e saj”.

“Pse Evropa po e pengon shkrirjen e parave të Putinit?” vazhdoi ai, shkruan A2 CNN.

“SHBA beson se Belgjika, Franca dhe vende të tjera po e bllokojnë. Është absurde. Ne duhet të jemi serioz dhe të shpejtë.”