Media izraelite plas bombën: Trump është gati të godasë Iranin, javë kyçe

Izraeli vlerëson se Shtetet e Bashkuara janë drejt një sulmi ushtarak ndaj Iranit dhe se situata ka hyrë në një fazë vendimtare, të cilësuar si “javë kyçe”.

Lajmi raportohet nga Channel 13 (CH13) në Izrael, duke iu referuar burimeve të sigurisë.

Sipas këtij vlerësimi, tensionet mes Washingtonit dhe Teheranit kanë arritur një pikë kritike, ndërsa autoritetet izraelite po ndjekin nga afër zhvillimet dhe po koordinohen ngushtë me partnerët amerikanë.

Gjatë një takimi me komandantin e CENTCOM-it, gjeneralin Brad Cooper, zyrtarë të lartë të Forcave të Mbrojtjes së Izraelit (IDF) kanë kërkuar që çdo sulm i mundshëm ndaj Iranit të mos kufizohet vetëm në objektiva simbolike apo paralajmëruese.

Sipas burimeve izraelite, IDF ka insistuar që një operacion ushtarak i SHBA-ve të përfshijnë goditje të drejtpërdrejta ndaj:

• sistemeve iraniane të raketave tokë-tokë,
• infrastrukturës strategjike ushtarake,
• dhe institucioneve shtetërore kyçe të regjimit iranian.

Qëllimi, sipas Izraelit, do të ishte dobësimi real i kapaciteteve ofensive të Iranit dhe dërgimi i një mesazhi të qartë parandalues, jo vetëm ndaj Teheranit, por edhe ndaj aktorëve rajonalë që veprojnë në koordinim me të.

Deri më tani, nuk ka një konfirmim zyrtar nga Washingtoni për një vendim përfundimtar mbi një sulm, por sinjalet diplomatike dhe ushtarake sugjerojnë se ditët në vijim mund të jenë vendimtare për sigurinë në Lindjen e Mesme.