Medvedev: Sulmi në Krime mund të nxisë “ditën e kijametit”

Refuzimi i Ukrainës dhe fuqive perëndimore për të njohur kontrollin e Krimesë nga Moska, përbën një “kërcënim sistematik” për Rusinë dhe çdo sulm i jashtëm në rajon do të nxisë një përgjigje të “Ditës së Gjykimit”, tha të dielën ish-president Dmitry Medvedev.

Rusia aneksoi gadishullin e Krimesë të Detit të Zi nga Ukraina në vitin 2014, pasi një president pro-Moskës në Kiev u rrëzua pas protestave masive në rrugë. Moska më pas mbështeti gjithashtu separatistët e armatosur pro-rusë në rajonin Donbas të Ukrainës lindore, shkruan Reuters.

Në rast të një sulmi në Krime, Medvedev ka thënë se “Dita e Gjykimit do të vijë shumë shpejtë dhe do të jetë e vështirë. Do të jetë shumë e vështirë të fshihesh”.

Medvedev nuk dha detaje, por më parë ka paralajmëruar Shtetet e Bashkuara për rreziqet e përpjekjes për të ndëshkuar një fuqi bërthamore si Rusia për veprimet e saj në Ukrainë, duke thënë se kjo mund të rrezikojë njerëzimin.

Komentet e tij u transmetuan një ditë pasi një zyrtar ukrainas sugjeroi se Krimea, të cilën pjesa më e madhe e botës e njeh ende si pjesë të Ukrainës, mund të jetë një objektiv për raketat HIMARS të prodhuara nga SHBA, të vendosura së fundmi nga Kievi teksa lufton me forcat ruse.