Ministri i Mbrojtjes, Armend Mehaj, i ka reaguar ministrit të Brendshëm të Serbisë, Aleksandar Vulinit, pasi ky i fundit edhe një herë tjetër mohoi Masakrën e Reçakut. Mehaj përmes një shkrimi në Facebook ka shkruar se “bota di të vërtetën edhe të Vukovarit e Srebrenicës siç di, parë e ndjerë edhe Masakrën e Reçakut”.
Mehaj, duke e konsideruar Vulinin si pinjoll të kryekriminelit Slodoban Millosheviqit, shtoi se janë mësuar me mposhtjen e së vërtetës për projektin barbar serb mbi 150-vjeçar për shfarosjen e shqiptarëve, me gënjeshtra e poshtërsi.
“Neve nuk na befason asgjë nga skenarët e tillë antishqiptarë dhe antinjerëzorë të kreatorëve të krimeve më çnjerëzore. Bota di të vërtetën edhe të Vukovarit e Srebrenicës siç di, parë e ndjerë edhe masakrën e Reçakut. E vërteta e madhe, gur e shpirt i skalitur është edhe Almiri 14-vjeçar që iu këputë jeta bashkë me 45 familjarë e bashkëfshatarë të Reçakut, për të vetmin “faj” se ishin shqiptarë, nga gjakatarët barbarë serb, që udhëhiqeshin atë kohë nga qeveria kriminale serbe ku bënte pjesë edhe Vuçiq. Bota e vlerave demokratike dhe humane duhet të reagoj fuqishëm ndaj kësaj bastardie të qeverisë serbe të radhës, sepse Ne nuk harrojmë kurrë”, ka shkruar ministri i Mbrojtjes.
Mohimi i Masakrës së Reçakut nga Vulin ka ngjallur reagime të shumta ditëve të fundit, përfshirë edhe Bashkimin Evropian.
