Mijëra gjurmë dinozaurësh zbulohen në një mal në Itali, dëshmi unike e jetës 210 milionë vjet më parë

Një zbulim i jashtëzakonshëm shkencor ka tronditur botën e paleontologjisë në veri të Italisë, ku janë identifikuar mijëra gjurmë dinozaurësh, të datuara rreth 210 milionë vjet më parë.

Gjurmët janë gjetur në Parku Kombëtar Stelvio, në një mur të pjerrët malor që shtrihet për qindra metra.

Sipas studiuesve, disa nga gjurmët arrijnë deri në 40 centimetra diametër dhe janë të rreshtuara paralelisht, duke ruajtur qartë shenjat e gishtërinjve dhe kthetrave. Kjo sugjeron se dinosaurët lëviznin në tufa të organizuara dhe në harmoni me njëri-tjetrin.

Ekspertët besojnë se gjurmët i përkasin prosauropodëve, dinosaurë barngrënës me qafë të gjatë, kokë të vogël dhe kthetra të mprehta, të cilët mund të arrinin deri në 10 metra gjatësi. Ata zakonisht ecnin mbi dy këmbë, por në disa raste janë gjetur edhe gjurmë duarsh përpara shenjave të këmbëve, çka tregon se ndaleshin herë pas here për të mbështetur gjymtyrët e përparme në tokë.

Paleontologu me bazë në Milano, Cristiano Dal Sasso, e cilësoi zbulimin si të papritur dhe unik.

“Kurrë nuk do ta kisha imagjinuar se do të ndeshesha me një zbulim kaq spektakolar në rajonin ku jetoj”, u shpreh ai, duke e përshkruar zonën si një “thesar të jashtëzakonshëm shkencor”.

Gjurmët u vunë re për herë të parë në shtator të vitit të kaluar nga fotografi Elio Della Ferrera, i cili po eksploronte zonën e thellë malore. Ai deklaroi se shpreson që ky zbulim të shërbejë si një reflektim për njerëzit, duke treguar “sa pak dimë ende për vendet ku jetojmë dhe për planetin tonë”.

Sipas studiuesve, gjatë periudhës Triasike, rreth 250-201 milionë vjet më parë, zona ku sot ndodhet muri shkëmbor ishte një fushë baticash me baltë, e cila më vonë u bë pjesë e vargut Alpin. Analiza e gjurmëve tregon jo vetëm lëvizje kolektive, por edhe sjellje më komplekse, si formime rrethore të tufave, që mund të kenë shërbyer për mbrojtje.

Për shkak se zona është e thellë dhe e paarritshme nga shtigjet tradicionale, Ministria e Kulturës e Italisë ka njoftuar se studimi do të vijojë përmes përdorimit të dronëve dhe teknologjive të sensorëve në distancë.

Parku Kombëtar Stelvio ndodhet në Luginën Fraele, pranë kufirit me Zvicrën, zonë që vitin e ardhshëm do të jetë gjithashtu pranë vëmendjes ndërkombëtare për shkak të Lojërave Olimpike Dimërore.

Autoritetet italiane e kanë cilësuar këtë zbulim si një lidhje simbolike mes historisë së lashtë të planetit dhe ngjarjeve madhore të së tashmes.