Mrekullia e shkencës, fëmija vjen në jetë nga mitra e dhurueses së vdekur

Një djalosh i sapolindur është bërë fëmija i parë në Mbretërinë e Bashkuar që ka ardhur në jetë duke përdorur një mitër të transplantuar nga një dhuruese e vdekur.

Grace Bell, e cila është në të 30-at dhe nuk ka mitër, thotë se djali i saj i vogël Hugo, i cili tani është 10 javësh, është “thjesht një mrekulli”.

Kirurgët thanë se lindja ishte “një moment historik revolucionar”, i cili mund t’u japë shpresë shumë grave të tjera me një diagnozë të ngjashme.

Hugo lindi pak para Krishtlindjeve të vitit që lamë pas, me peshë gati 3.2 kilogramë, në spitalin Queen Charlotte’s and Chelsea në perëndim të Londrës.

Bell ka lindur pa mitër dhe nuk ka cikël menstrual, por ka vezore normale, një gjendje e quajtur sindroma MRKH. Në moshën 16-vjeçare, asaj iu tha se nuk do të mund të lindte kurrë fëmijë.

Për të pasur një fëmijë, e vetmja mundësi e çiftit ishte të shpresonin për një transplant mitre ose të ndiqnin rrugën me nënë zëvendësuese (surrogacisë).

Kur mori një telefonatë që i thoshte se ishte dhuruar një mitër dhe se transplantimi ishte i mundur, Bell tha se ishte “e shokuar” dhe “shumë e emocionuar”.

Operacioni i transplantimit të mitrës së Bell zgjati 10 orë dhe u krye në spitalin Churchill në Oksford në qershor 2024, përpara se çifti të niste fertilizimin artificial disa muaj më vonë, i ndjekur nga transferimi i embrionit.

Një foshnjë e lindur pas transplantimit të një mitre nga një dhuruese e vdekur nuk ka asnjë lidhje gjenetike me donatoren.

Transplantimi i suksesshëm i mitrës së Bell nga një dhuruese e vdekur është vetëm një nga 10 transplantet e tilla që po kryhen si pjesë e një studimi klinik në Mbretërinë e Bashkuar. Tre janë realizuar tashmë, por ky është foshnja i parë që ka ardhur në jetë.

Më shumë se 100 operacione transplantimi mitre janë kryer në mbarë botën dhe si rezultat kanë lindur më shumë se 70 foshnja të shëndetshme.

Çifti mund të vendosë të ketë një fëmijë të dytë, pas së cilës kirurgët do të heqin mitrën e transplantuar. Kjo bëhet për ta shpëtuar Bell nga marrja gjatë gjithë jetës e barnave të forta për të parandaluar që sistemi imunitar i trupit të sulmojë organin e transplantuar.