Në rrjete sociale janë publikuar video të një grupi burrash serbë nga Graçanica që ka udhëtuar drejt Beogradit në mënyrë të organizuar për të mbështetur “studentët që duan të studiojnë” në parkun afër Presidencës së Serbisë.
Në mesin e tyre, siç ka shkruar “Radiokim”, shumica janë burra më në moshë.
Siç raportohet, shumica e atyre që kanë udhëtuar janë punonjës të “institucioneve serbe”, por edhe ata që “s’kanë kontrata të përhershme”.
Branimir Stojanoviq nga Lëvizja Kombëtare Serbe ka thënë se “ata janë aktivistë të Listës Serbe, Partisë Progresiste Serbe dhe të obliguar për t’i dëgjuar strukturat”.
Se presidenti i Serbisë, Aleksandar Vuçiq, po paguan serbë nga Kosova për të shkuar në kampin e ngritur para Presidencës Serbe, një ditë më parë tha edhe gazetari dhe udhëheqësi i lëvizjes “Dashuri, besim, shpresë” në Serbi, Nemanja Sharoviq.
Që nga fundjava e shkuar serbë, që thonë se janë studentë, janë grumbulluar në një park afër Presidencës së Serbisë dhe kanë ngritur kamp. Sipas raportimeve të mediumeve të pushtetit, ata janë “studentë që duan të mësojnë”, dhe që “duan të kthehen në klasat e tyre sa më shpejtë që të jetë e mundshme”.
Ky kamp po konsiderohet si “mburojë” për Vuçiqin para protestës së paralajmëruar për 15 mars nga studentët.
Serbia është duke u përballur vazhdimisht me protesta masive të studentëve që po kërkojnë drejtësi për 15 viktimat e 1 nëntorit kur në Novi-Sad u shemb streha e hekurudhës.
