Një foto e Netanyahut duke mbuluar kamerën e telefonit të tij po bëhet virale në mediat sociale

Fotografitë e kryeministrit izraelit Benjamin Netanyahu, duke mbajtur një telefon me kamerat e mbuluara me shirit ngjitës, kanë ndezur një debat të gjerë në rrjetet sociale.

Pamjet nga brenda Knesset-it izraelit (Parlamenti), të hënën, treguan Netanyahun të ulur në tryezën e qeverisë brenda sallës me një telefon celular të llojit “iPhone” në dorë, ku mbi kamera ishin vendosur shirita ngjitës, gjë që ngriti pikëpyetje mbi qëllimin e këtij veprimi.

Netanyahu u shfaq gjithashtu në një tjetër foto që qarkulloi gjerësisht në rrjetet sociale, duke mbuluar kamerën e telefonit të tij me shirit ngjitës ndërsa fliste në telefon. Besohet se kjo masë synon të parandalojë spiunimin ose regjistrimin e bisedave.

Sipas gazetës izraelite “Ma’ariv”, Netanyahu ka deklaruar disa herë se ai nuk mban një telefon celular me vete në mënyrë të vazhdueshme, ndërkohë që asistentët e tij zotërojnë disa telefona dhe i ndërrojnë ato herë pas here.

Në rast se Kryeministri izraelit dëshiron të bëjë një telefonatë, asistenti i tij i jep një nga telefonat për ta përdorur, i cili kthehet mbrapsht menjëherë pas përfundimit të bisedës.

Zyrtarët e lartë që mbajnë poste të ndjeshme përdorin kryesisht telefona të kompanisë ‘Apple’ dhe shmangin përdorimin e telefonave kinezë nga frika e rrjedhjes së informacionit.

Lidhur me shiritat ngjitës të vendosur mbi kamera, gazeta ‘Ma’ariv’ sqaroi se çdo punonjës dhe vizitor në objektet e industrisë ushtarake ose në objektet e ndjeshme të sigurisë, kërkohet që në portat hyrëse të vendosë një shirit ngjitës mbi kamera, me qëllim që të garantohet mospërdorimi i tyre gjatë vizitës.

Në rast të heqjes së shiritit ngjitës, mbeten shenja që dëshmojnë këtë veprim, gjë që u mundëson forcave të sigurisë të verifikojnë rastet kur dyshohet për përdorim të kamerave brenda objekteve.

Në rastin e Netanyahut, sipas gazetës, vendosja e ngjitësve nuk lidhet me frikën e përdorimit të kamerës së telefonit për të fotografuar në zona të ndaluara, por synon parandalimin e mundësisë së hakerimit të telefonit dhe aktivizimit të kamerave në distancë.”