“Nuk pati gjakderdhje siç e planifikoi Berisha me një grup kriminelësh”, Basha: I ngjashëm me Ramën, i eksiton dhuna

Lulzim Basha në një deklaratë për mediet ditën e sotme, akuzoi Sali Berishën se kishte planifikuar të kishte gjakderdhje në protestën e 8 janarit të zhvilluar përballë selisë blu. Ai e akuzoi Berishën se është njësoj si Rama dhe të dy eksitohen nga skenat e dhunës. Sipas Bashës, përfituesi i vetëm nga dhuna në selinë e PD-së është Edi Rama.

Basha: Sot unë nuk kam buzëqeshje në fytyrë. Për fat të mirë dje nuk pati gjakderdhje ashtu siç dëshiron dhe kishte planifikuar Sali Berisha me një grup kriminelësh. Për fatin e mirë të PD e të shqiptarëve dje nuk u derdh gjak dhe unë e di që eksitimi përballë kësaj skene dhune, eksitimi që nuk fshihte dot dje kur shikonte njerëz që dëmtoheshin e ka shoqëruar edhe sot siç ka shoqëruar dhe Edi Ramën në skena të ngjashme si ato të 21 janarit. Këtu janë njësoj dhe të ngjashëm dhe unë ndahem nga të dy.

Të dy kanë një gëzim që mezi e fshehin, i pari Sali Berisha sepse ndonëse dështoi me turp të merrte dhe të zaptonte vullnetin e demokratëve nuk e fsheh dot eksitimin që i shkakton dhuna që ai nxit. I dyti, Edi Rama është përfituesi i vetëm dhe sot e tregoi me daljen e tij të turpshme. Njeriu që po bën gjithçka për të mbuluar skandalin e incineratorëve. Njeriu që kanabizoi Shqipërinë, i 1001 skandaleve doli sot dhe na shiste moral dhe këtë ja mundësoi Berisha. Rama dhe Berisha janë lidhur me një binom.