Nxehet puna, Komshiq thotë se do ta ndalojnë Dodikun nëse nuk e ndalin të huajt

Kryetari i Presidencës së Bosnjë e Hercegovinës, Zheljko Komshiq ka deklaruar se nëse të huajt nuk e ndalojnë anëtarin serb presidencës trepalëshe, Milorad Dodik, të cilin ai e quan “grabitës”, nuk do të ketë zgjidhje tjetër veçse atë ta ndalojë ai vetë.

Komshiq e tha këtë në një intervistë për Radio Sarajevën, duke komentuar edhe mbështetjen që Dodik e gjen te kryeministri i Hungarisë, Viktor Orban.

Ai tha se deklaratat e kryeministrit hungarez kundër myslimanëve boshnjakë janë fashiste dhe e kthejnë Evropën në vitet 1930 dhe 1940.

Komshiq vlerësoi se “qëndrime të tilla janë më shumë problem i Evropës në tërësi sesa myslimanët në Bosnjë”.

Anëtari serb i Presidencës së Bosnjë e Hercegovinës, Milorad Dodik kërcënoi hapur të mërkurën se do ta ndalojë punën e organeve gjyqësore shtetërore në territorin e Republika Srpskas dhe se ligjet e RS do të miratohen brenda një muaji për t’i legalizuar përpjekjet e para konkrete për shkëputjen nga Bosnja.

Ai konfirmoi se politika e tij nuk ka shumë mbështetës në Evropë, por vlerësoi kryeministrin hungarez Viktor Orban, të cilin e quajti “një burrë shteti i rëndësishëm evropian” dhe “vizionar”, ndërsa tha se RS do të vazhdojë të zhvillojë marrëdhënie miqësore me Hungarinë.

Dje, The Guardian, shkroi se si Komisioneri i Bashkimit Evropian për Zgjerim, Oliver Várhelyi është i afërt me kryeministrin hungarez, Viktor Orban. Gazeta britanike shkroi se Várhelyi i ka kërkuar Dodikut vetëm që ta shtyej pak planin e tij për shpërbërjen e Bosnjës.