Operacioni “Absolute Resolve”: SHBA përdori 150 avionë për kapjen e Maduros

Shefi i Shtabit të Përbashkët amerikan, gjenerali Dan Caine, deklaroi se operacioni ushtarak në Venezuelë u nis me kërkesë të Departamentit të Drejtësisë dhe u kodua me emrin “Absolute Resolve”.

Sipas tij, misioni përfshiu 150 avionë që vepruan në disa drejtime për të çmontuar mbrojtjen ajrore të Venezuelës, duke i hapur rrugë helikopterëve amerikanë të hynin në Karakas.

Caine tha se një ekip i dytë helikopterësh u aktivizua për të nxjerrë Nicolás Maduron dhe bashkëshorten e tij, Cilia Flores, dhe se këta helikopterë u vunë nën zjarr gjatë operacionit. Ai shtoi se një nga avionët amerikanë u godit, por mbeti i aftë për fluturim.

Sipas gjeneralit amerikan, i gjithë operacioni zgjati rreth dy orë e 20 minuta dhe u mbështet në përvojën shumëvjeçare të ushtrisë amerikane në operacione të ndërlikuara speciale.