Drejtori i Zyrës për Kosovën në Qeverinë e Serbisë, Petar Petkoviq, ka thënë se Qeveria e Serbisë të hënën ka marrë një vendim që mundëson lirinë e lëvizjes për të gjitha automjetet nga Kosova, që ka qenë obligim i saj sipas marrëveshjes së vitit 2011 të arritur mes palëve në dialogun e ndërmjetësuar nga Kosova.
Petkoviq në një deklarim për media ka thënë se pjesë e vendimit është edhe një deklaratë që pohon qartë se ky vendim nuk do të thotë njohje e Kosovës, raporton KosovoOnline.
Ai ka thënë se vendimi do të zbatohet nga 1 janari.
“Ky vendim në fakt ishte detyrim i yni nga marrëveshja e vitit 2011 për lirinë e lëvizjes e nënshkruar nga Borko Stefanoviq, e cila u referohet targave RKS dhe letërnjoftimeve të Kosovës, lejimin e patentëshoferëve të Kosovës”, citohet të ketë thënë Petkoviq.
Ai ka thënë se këtë vendim Qeveria e Serbisë e
Qeveria e Serbisë, thotë ai, e mori vendimin me këtë detyrim në mendje, dhe në pritje që Prishtina të përmbushë detyrimet e saj sipas Marrëveshjes së Brukselit, dhe jo vetëm ZSO-së.
“Sot kemi mundësuar lirinë e lëvizjes për të gjitha automjetet nga Kosova. Ky do të jetë një impuls i shtuar jo vetëm për ‘Ballkanin e Hapur’, por do t’ua lehtësojë jetën serbëve në Kosovë … Në fakt ne i ndihmuam ata që të jenë në gjendje të lëvizin dhe të jetojnë normalisht, sepse liria e lëvizjes është e nevojshme. Ndryshe nga Kurti, i cili shkel mbi lirinë e lëvizjes, ashtu siç shkel çdo ditë të drejtat e serbëve në Kosovë”, deklaroi Petkoviq.
