Plas sherri te Stupcat, Osmani Azemi u kërkon llogari kolegëve për 150 mijë euro, i drejtohet gjykatës

“Rikthimi i Stupcave” ka bërë bujë të madhe ditëve të fundit. E gjithë kjo nisi nga deklarata e Vedat Bajramit, i cili kishte thënë që “Stupcat” do të rikthehen me Vedatin dhe Mensurin. Këto fjalë i pohoi edhe Mensur Safqiu, i cili tha që Vedati ka folur në emër të tij.

Osman Azemi megjithatë ka refuzuar të flasë shumë lidhje me temën, për siç thotë ai, shkaku i respektit që ka ndaj kolegëve.

“Për shkak te korrektësisë dhe respektit qe kam për koleget e mi qe kemi punuar bashkë dy dekada kisha pas dëshirë që të kontaktoni zyrën ligjore gjegjësisht avokatin dhe të më kurseni mua”, tha ai për Indeksonline.

Avokati Kushtrim Palushi, i cili përfaqëson Osman Azemin për Indeksonline tha se ka dyshime serioze për keqpërdorime financiare të mëdha në kompaninë “Stupcat Group”. Lidhur me këtë, avokati nesër do t’i drejtohet organeve kompetente, Prokurorisë së Shtetit dhe ATK-së, për të hetuar dhe zbuluar veprat e mundshme penale që janë kryer.
Siç thotë ai, Osman Azemit i është refuzuar kërkesa për auditimin dhe kontrollin e brendshëm të kompanisë “Stupcat Group” për periudhën e transaksioneve financiare mes viteve 2015-2021 nga aksionarët tjerë, Vedat Bajrami dhe Mensur Safçiu. Kështu, Osman Azemi ka kërkuar auditimin e transaksioneve financiare me iniciativë të tij, ku sot më datë 19.10.2022 ai ka pranuar edhe raportim e auditimit për atë periudhë (bazuar vetëm në në pasqyrat e llogarive bankare dhe deklaratat tatimore të kompanisë Stupcat Group.

Sipas atij raporti, kontabilisti Ekrem Sadiku gjatë asaj periudhe ka tërhequr nga xhirollogaria bankare e Stupcat Group shumën prej së paku 152,514.00 Euro, pa dijeninë dhe pa autorizimin e Osman Azemit, si aksionar dhe drejtor i kompanisë Stupcat Group. Osman Azemi nuk ka njohuri se ku kanë përfunduar ato mjete dhe me autorizim të kujt i ka tërhequr.

Osman Azemi kërkon nga aksionarët e kompanisë Stupcat Group dhe kontabilisti, që të mos ndërmarrin asnjë veprim të mëtutjeshëm me xhirollogaritë bankare të kompanisë Stupcat Group, përfshirë, por pa u kufizuar në tërheqje të mjeteve monetare, transfere të mjeteve monetare, ekzekutim të pagesave (përveç pagesës së tatimit të deklaruar), ndryshim apo dëmtim të provave materiale dhe çfarëdo veprimi tjetër me të cilin do të mund të dëmtonin hetimin për veprat penale që mund të jenë kryer.

Sa i përket rikthimit të Stupcave, Osman Azemi kërkon miqësisht nga bashkëkrijuesit e tjerë të markës Stupcat që të mos i përdorin atë deri në zgjidhjen përfundimtare të mosmarrëveshjeve.