Prokuroria Speciale kërkon urdhërarrest për Rakiçin

Prokuroria Speciale ka parashtruar kërkesë në Gjykatën Themelore në Prishtinë për lëshimin e urdhërarrestit ndaj ish-kryetarit të Listës Serbe, Goran Rakiç, lidhur me rastin e barrikadave në katër komunat veriore të Kosovës gjatë vitit 2022.

Rakiçi, i cili është deputet në Kuvendin e Serbisë nga radhët e Partisë Progresive Serbe (SNS), nuk iu është përgjigjur tri ftesave të prokurorisë për intervistim. Zëdhënësja e Prokurorisë Speciale, Arbnora Luta, ka konfirmuar se tashmë janë intervistuar kryetari aktual i Listës Serbe, Zlatan Elek, si dhe deputetët e saj, Slavko dhe Igor Simiç.

“Tashmë ka përfunduar intervistimi edhe i të pandehurve S.S, I.S., dhe Z.E. Ndërsa, sa i përket intervistimit të G.R., i njëjti është ftuar tri herë, por nuk është paraqitur, fillimisht duke arsyetuar mungesën me probleme shëndetësore, ndërsa për dy ftesat e tjera nuk ka dhënë ndonjë arsyetim”, ka deklaruar Luta për shtypin në Prishtinë.

Ndryshe, serbët e veriut nën udhëheqjen e Listës Serbe kishin bllokuar rrugët që të çojnë drejt dy pikëkalimeve kufitare mes Kosovës dhe Serbisë – Jarinjë dhe Bërnjak – në dhjetor të vitit, duke pamundësuar lëvizjen e lirë të qytetarëve dhe mallrave.