“Protestë çdo ditë”, pedagogët bojkotojnë mësimin ditën e hënë

Sindikata e Punonjësve të Universiteteve ka vendosur që ditën e hënë më 17 Tetor të bojkotojë mësimin deri sa kërkesat e tyre të dëgjohen nga qeveria.

Kështu, ditën e hënë, kur nis edhe viti i ri akademik, do të bëhet vetëm prezantimi i studentëve të rinj nga ora 08:00 deri në orën 10:00, ndërsa procesi mësimor do të bojkotohet.

Sipas Sindikatës, protesta e pedagogëve do të bëhet edhe çdo ditë pas të hënës përpara fakulteteve. Këto protesta ditore do të jenë 2-orëshe, nga ora 10:00 deri në 12:00.

Pedagogët kanë paralajmëruar se nëse kërkesat e tyre nuk do të plotësohen do të bojkotojnë mësimin.

Kërkesat e pedagogëve:

-Rritja e pagave për pedagogët dhe stafin ndihmës (nuk është plotësuar)
-Rritja e financimit për kërkimin shkencor (nuk është plotësuar)
-Rivendosja e shtesave mbi pagë për ‘Dëshmëri shëndeti në punë’ (nuk është plotësuar)
-Rritja e shtesës mbi pagën për vjetërsinë në punë (nuk është plotësuar)
-Rritja e pagesës së orëve të ngarkesës suplementare (do shqyrtohet)
-Rivlerësimi i orës mësimore pasi ka zbritje prej 50% të pagesës së orës mësimore si rezultat i mosfierencimit të orës mësimore të leksionit. (do shqyrtohet)
-Rishikimin e tatimit prej 23% mbi pagesën e ngarkesës suplementare (do shqyrtohet)
-Të pezullohet deri më 2026 zbatimi i pikës c) të paragrafit të 3, i Kreut III të VKM Nr.112, datë 23.2.2018 për kriteret e marrjes së titullit “Profesor”. (do shqyrtohet)
-Të bëhet transparencë mbi buxhetin dhe të ardhurat e universitetet publike. (është rënë dakord)