Rusia është duke u përballur me qindra viktima çdo ditë, teksa zhvillon luftën në Ukrainë, dhe ka humbur mijëra togerë e kapitenë, që prej 24 shkurtit.
Është kjo deklarata e një zyrtari të lartë amerikan, sipas raportimeve nga agjencia e lajmeve, Reuters.
Përveç togerëve dhe kapitenëve, qindra kolonelë dhe shumë gjeneralë rusë janë vrarë po ashtu, sipas zyrtarit.
Uashingtoni beson se Ukraina ka shkatërruar më shumë se 100 shënjestra të vlefshme ruse brenda Ukrainës.
Ditën e djeshme, shefi britanik i inteligjencës, Richard Moore është shprehur se Rusia do ta ketë të vështirë që të vazhdojë fushatën ushtarake, dhe Ukraina mund të aktivizohet në kundërsulm.
Sipas tij, Rusia është përballur me humbje tepër të rëndësishme në synimet e saj fillestare të luftës në Ukrainë, siç janë: rrëzimi i presidentit Volodimir Zelenski, kontrollimi i Kievit dhe prishja e unitetit brenda Perëndimit.
