Ripublikohet intervista e Zhizhekut ku paralajmëronte luftën në Ukrainë – “Njësitet ruse po trajnohen në Republika Srpska, Lufta e Tretë Botërore ka nisur”

Gazeta kroate Veçernji List ka ripublikuar intervistën me filozofin e madh slloven, Sllavoj Zhizhek, i cili muaj para se të fillonte pushtimi rus i Ukrainës e kishte thënë se Vladimir Putin do të niste Luftën e Tretë Botërore.

Gjithashtu Zhizhek kishte thënë se situata më shqetësuese në rajon do të ndodh në Bosnje dhe Hercegovinë, përkatësisht në entitetin serb të BeH-së, në “Republika Srpska”, ku me kohë njësitet speciale ruse po zhvillonin ushtrime ushtarake të gjera.

Filozofi slloven pati deklaruar se qëllimi i Putin është të ketë shtete mbi baza të pastërta etnike, për çka kishte thënë se një gjë e tillë do të rezultonte në katastrofë.

“Njësitet vullnetare speciale ruse janë në trajtin në Republika Srpska. Ka prezencë të fuqishme ushtarake, madje edhe mbrojtëse ruse atje, e cila do të merr kuptim krejtësisht të re në kontekstin e luftës në Ukrainë”, kishte paralajmëruar saktësisht Zhizhek muaj para se të niste lufta në Ukrainë.

Zhizhek këtë e kishte quajtur “fillim të Luftës së Tretë Botëtore”, teksa thoshte se “grupi Wagner është prezent në Republika Srpska”.

“Të vdesësh për atdheun gjithmonë ka qenë ëndrra e nacionalistëve, edhe pse kjo gjë nuk do të thotë të vdesësh vetvetiu në person. Ata duan të dërgojnë dikë tjetër që të vdesë për lavdinë e tyre”, citohet të ketë thënë Zhizhek.